Kalyan Shiv Sena : 'उद्याच २५ लाख दे, नाहीतर...' शिवसेना नगरसेवकाला जीवे मारण्याची धमकी, ठाणे जिल्ह्यात पुन्हा खळबळ

संघर्ष गांगुर्डे, कल्याण प्रतिनिधी

Kunal Patil death threat Kalyan latest news : कल्याण-डोंबिवली महापालिकेतील शिवसेना शिंदे गटाचे नगरसेवक कुणाल पाटील यांना परदेशातून आलेल्या एका फोनद्वारे जीवे मारण्याची धमकी देण्यात आल्याची धक्कादायक घटना समोर आली आहे. तसेच त्यांच्याकडून तब्बल २५ लाख रुपयांची खंडणी मागण्यात आल्याचाही आरोप आहे. या घटनेमुळे कल्याणच्या राजकीय वर्तुळात तीव्र खळबळ उडाली आहे.

कुणाल पाटील यांना आलेल्या या आंतरराष्ट्रीय फोन कॉलवरून त्यांना आणि त्यांच्या कुटुंबाला जीवे मारण्याची धमकी देण्यात आली आहे. या धमकीच्या फोन कॉलची एक ऑडिओ क्लिपदेखील समोर आली असून, त्यामध्ये २५ लाख रुपयांची खंडणी मागण्यात आल्याचा दावा केला जात आहे.

या प्रकरणात 'एच. पी. पुजारी' उर्फ 'अण्णा' नावाच्या एका गँगस्टरचा उल्लेख केला जात आहे. मात्र, या दाव्याची आणि आरोपांची अधिकृत माहिती पोलीस तपासातूनच स्पष्ट होणार आहे.

घटनेचे गांभीर्य लक्षात घेऊन नगरसेवक कुणाल पाटील यांनी याप्रकरणी कल्याणच्या मानपाडा पोलीस ठाण्यात अधिकृत तक्रार दाखल केली आहे. या तक्रारीच्या आधारे पोलीस धमकीच्या कॉलचा मूळ स्रोत, संबंधित व्यक्ती आणि खंडणीमागचे कारण यांचा सखोल तपास करत आहेत.

एका लोकप्रतिनिधीलाच कुटुंबासह जीवे मारण्याची धमकी मिळाल्यामुळे कल्याण-डोंबिवलीतील राजकीय व सामाजिक वर्तुळात चिंतेचे वातावरण पसरले आहे. या धमकीमागे नेमका कोणाचा हात आहे आणि २५ लाखांची खंडणी का मागण्यात आली, याचा शोध आता पोलीस घेत आहेत.