Rishabh Pant : आयपीएल विश्वात खळबळ!ऋषभ पंतनं अचानक घेतला मोठा निर्णय, LSG चे कर्णधारपद सोडलं

आयपीएलच्या यंदाच्या हंगामातील प्रवास प्लेऑफ शर्यतीआधीच थांबल्यानंतर लखनऊ सुपर जायंट्सचा कर्णधार ऋषभ पंतने मोठा निर्णय घेतला आहे. २७ कोटी रुपये मोजून खरेदी केलेल्या पंतने लखनऊ संघाचं कर्णधारपद सोडण्याचा निर्णय घेतला आहे. पंतच्या या निर्णयामुळं आयपीएल विश्वात खळबळ उडाली आहे.

लखनऊ सुपर जायंट्स यंदाच्या आयपीएल २०२६ मधून बाहेर झाली आहे. पुढील आयपीएल हंगामापासून ऋषभ पंत हा कर्णधार नसेल. लखनऊ सुपर जायंट्स फ्रेंचाइजीने एक्स या सोशल मीडिया प्लॅटफॉर्मवर ही माहिती दिली. पंत यानं स्वतःहून कर्णधारपदाच्या जबाबदारीतून मुक्त होण्याची विनंती केली होती. ती विनंती आम्ही स्वीकारत आहोत, असे पोस्टमध्ये म्हटले आहे.

ऋषभ पंत याने लखनऊ सुपर जायंट्सचं कर्णधारपद सोडत असल्याची विनंती केली. फ्रेंचाइजीने त्याची विनंती स्वीकारली आहे. याबाबत आम्ही औपचारिक घोषणा करत आहोत, असे संघ व्यवस्थापनाने म्हटले आहे. याबाबत पंत याने फ्रेचाइजीशी संपर्क साधला होता. त्याचा सन्मान ठेवून आम्ही त्याची विनंती स्वीकारली आहे. असे निर्णय कधीच सोपे नसतात. कर्णधार म्हणून पंत याने दिलेल्या योगदानाबद्दल आम्ही त्याचे आभारी आहोत. आता आमचं संपूर्ण लक्ष हे संघाच्या सामूहिक विकासावर आहे. सर्वश्रेष्ठ स्थानी पोहोचण्यासाठी संघाची पुन्हा उभारणी करणे आणि पुनर्गठन करण्याचे आमचे लक्ष्य आहे, असे टॉम मूडी यांनी म्हटले आहे.

आयपीएल २०२६ मध्ये लखनऊ सुपर जायंट्सची कामगिरी निराशाजनक होती. १४ सामन्यांपैकी केवळ चार सामन्यांत विजय मिळवला. ८ गुणांसह संघ गुणतालिकेत १० व्या क्रमांकावर राहिला. ऋषभ पंत कर्णधार म्हणून अपयशी ठरला. त्याला २०२५ मध्ये झालेल्या आयपीएल ऑक्शनमध्ये लखनऊ सुपर जायंट्सने २७ कोटी रुपयांना खरेदी करून आपल्या संघात घेतले होते. त्याच्याकडून प्रचंड आशा होत्या. पण आयपीएल २०२५ मध्ये पंत आणि संघाची कामगिरीही चांगली होऊ शकली नव्हती. आयपीएल २०२६ मध्येही पंत आणि संघाची कामगिरी अत्यंत खराब झाली.