RCB कडून पराभव अन् राजस्थानच्या CEO नं थेट दारुचं दुकान गाठलं, सलग ५ सामने गमावल्याचं दु:ख पचवण्यासाठी...

IPL 2025 मधील ४२ व्या सामन्यात काल बंगळुरू आणि राजस्थान हे दोन संघ आमनेसामने आले. रॉयल लढतीत बंगळुरूने राजस्थानवर मात केली. हा सीझन राजस्थानसाठी फार वाईट ठरत आहे. राजस्थान रॉयल्सने ९ सामन्यांपैकी ७ सामने गमावले आहेत. राजस्थानच्या संघाला सलग पाच सामन्यांमध्ये पराभवाला सामोरे जावे लागले आहे. कालच्या पराभवानंतर राजस्थान रॉयल्सचे सीईओचा व्हिडीओ व्हायरल झाला.

व्हायरल व्हिडीओमध्ये राजस्थान रॉयल्सचे सीईओ जेक लश मॅक्रम बंगळुरूच्या एका मोठ्या दारुच्या दुकानात जाताना दिसतो. त्याच्यासोबत राजस्थान संघाची जर्सी घातलेला एक व्यक्ती चालत जात असल्याचे पाहायला मिळते. व्हिडीओमध्ये आरसीबीचा एक समर्थकाने मॅक्रम राजस्थानचा पराभव पचवण्यासाठी मद्यप्राशन करायला जात आहे, असे म्हटल्याचे दिसते. कॅप्शनमध्ये मॅक्रम टोनिक या दारुच्या दुकानाजवळ जात आहे असे लिहिले आहे.

राजस्थान रॉयल्सचा कर्णधार रियान परागने काल टॉस जिंकला आणि प्रथम गोलंदाजी केली. २० ओव्हर्समध्ये रॉयल चॅलेंजर्स बंगळुरूच्या खेळाडूंनी २०५ धावा केल्या. २०६ धावांचे लक्ष गाठण्यात राजस्थानचा संघ अपयशी ठरला. यशस्वी जयस्वालने सुरुवातीला आणि ध्रुव जुरेलने शेवटच्या ओव्हर्समध्ये चांगली कामगिरी केली. जुरेलची विकेट पडल्यानंतर राजस्थानने सामना गमावला.

दुसऱ्या बाजूला रॉयल चॅलेंजर्स बंगळुरूने कालच्या सामन्यात विजय मिळवत घरच्या स्टेडियमवर पराभूत होण्याची परंपरा मोडीत काढली. याआधी तीनदा आरसीबीचा संघ चिन्नास्वामी स्टेडियममध्ये खेळला होता. या तिन्हीही सामन्यांमध्ये त्यांना पराभव पचवावा लागला होता. कालच्या विजयानंतर बंगळुरूने पॉईंट्स टेबलवर तिसऱ्या स्थानी झेप घेतली.