भारतीय संघाने १७ वर्षांनंतर दुसऱ्यांदाच टी-२० वर्ल्डकपच्या ट्रॉफीवर नाव कोरलं. यापूर्वी एमएस धोनीच्या नेतृत्वाखाली खेळताना भारतीय संघाने २००७ मध्ये टी-२० वर्ल्डकपची ट्रॉफी उंचावली होती. आता दुसऱ्यांदा ही ट्रॉफी उंचावल्यानंतर खेळाडूंसह फॅन्सने एकच जल्लोष केला.
भारतीय संघ मायदेशात परतल्यानंतर आधी राजधानी दिल्लीत आणि त्यानंतर आर्थिक राजधानी मुंबईत विजयाचा जोरदार जल्लोष साजरा करण्यात आला. दरम्यान भारताच्या विजयानंतर महाराष्ट्राचे मुंख्यमंत्री एकनाथ शिंदे यांनी महाराष्ट्रातील ४ खेळाडूंना प्रत्येकी १ कोटी रुपये देणार असल्याची घोषणा केली आहे.
महाराष्ट्राचे मुंख्यमंत्री एकनाथ शिंदे यांनी ५ जुलैला भारतीय खेळाडूंना भेटीसाठी बोलावलं आहे. या भेटीसाठी वर्ल्डकप विजेत्या संघातील ४ खेळाडूंचा समावेश आहे. ज्यात रोहित शर्मा, सूर्यकुमार यादव, शिवम दुबे आणि यशस्वी जयस्वाल यांचा समावेश आहे. हे चारही खेळाडू महाराष्ट्रातील असून, मुंबईमध्येच राहतात. या भेटीचा कार्यक्रम आज संध्याकाळी ४ वाजता विधानसभेत पार पडणार आहे. या कार्यक्रमात चारही खेळाडूंना मुख्यमंत्री एकनाथ शिंदे यांच्या हस्ते प्रत्येकी १-१ कोटी रुपये बक्षीस म्हणून दिले जाणार आहे.
भारतीय संघातील खेळाडूंनी २९ जूनला बारबाडोसमध्ये दक्षिण आफ्रिकेचा पराभव केला. त्यानंतर १ जूलैला भारतीय संघातील खेळाडू भारतात येण्यासाठी निघणार होते. मात्र बारबाडोसमध्ये आलेल्या चक्रीवादळामुळे भारतीय खेळाडू येऊ शकले नव्हते. त्यानंतर ३ जूलै रोजी भारतीय वेळेनुसार दुपारी ३ वाजता भारतीय खेळाडू भारतात येण्यासाठी बारबाडोसहून रवाना झाले. एअर इंडियाचं स्पेशल चार्टर्ड विमान ४ जुलैला भारतीय खेळाडूंना घेऊन दिल्लीत लँड झालं.
दिल्ली विमानतळावर खेळाडूंनी विजयाचा जल्लोष केला. त्यानंतर हे खेळाडू ICT Maurya हॉटेलमध्ये गेले. इथे काही वेळ विश्रांती केल्यानंतर भारतीय खेळाडू १० वाजता पंतप्रधान नरेंद्र मोदींची भेट घेण्यासाठी रवाना झाले. मोदींची भेट घेतल्यानंतर खेळाडूंनी मुंबईची वाट धरली. मुंबईत आल्यानंतर भारतीय संघाची विजयी परेड पार पडली. वानखेडे स्टेडियमवर बीसीसीआयकडून खेळाडूंना १२५ कोटींचा धनादेश देण्यात आला.
Read Marathi news and watch Live TV. Breaking news from Maharashtra, India, Pune, Mumbai, Politics, Entertainment, Sports, Lifestyle at SaamTV. Get Live Marathi news on Mobile. Download the Saam Tv app for Android and IOS.