'मेस्सी'वादळ शमलं...! जगज्जेत्या खेळाडूची आंतरराष्ट्रीय फुटबॉलमधून निवृत्तीची घोषणा

आपल्या पोस्टमध्ये मेस्सीने लिहिले की, स्पेनविरुद्धचा अंतिम सामना हरल्यानंतर अवघ्या दोन दिवसांतच त्याने हा मोठा निर्णय घेतला होता. मात्र, वडिलांच्या निधनानंतर त्याने निवृत्ती घेण्याचा निश्चय अधिकच दृढ केला. मेस्सीने आपल्या पोस्टमध्ये निवृत्तीबाबत निर्णय घेणे अत्यंत वेदनादायी होतं, असं म्हटलंय.

सर्वाधिक गोल करणारा खेळाडू

मेस्सीनं फुटबॉल विश्वात मोठं नाव कमावलं आहे. त्यानं २०२२ च्या फीफा वर्ल्डकपमध्ये देशाला जेतेपद मिळवून देण्यात महत्वाची भूमिका निभावली. त्याचसोबत सलग दोन कोपा अमेरिकाचे दोन जेतेपदही जिंकून दिले आहेत. अभूतपूर्व अशा आंतरराष्ट्रीय कारकिर्दीत त्यानं अर्जेंटिनाकडून १८५ हून अधिक सामने खेळले आहेत. सर्वाधिक गोल करणारा खेळाडू म्हणून फुटबॉलच्या इतिहासातील महान खेळाडूंमध्ये त्याची नोंद झाली. विशेष बाब म्हणजे, क्लबकडून तो खेळणार असून त्याच्या चाहत्यांना 'गोलपर्वणी'चा अनुभव देणार आहे.

आंतरराष्ट्रीय फुटबॉलमधून निवृत्ती जाहीर करताना तो भावुक झाला. बराच विचार केल्यानंतर मी राष्ट्रीय संघातून संन्यास घेत आहे, असं सांगू इच्छितो. हा निर्णय खूपच कठीण होता. मला खूपच दुःख होत आहे. पण हीच योग्य वेळ होती, असं मला वाटतंय. मी माझ्याकडून सर्वोत्तम दिलं, असं मी शपथ घेऊन सांगतो, असं तो म्हणाला.

मी या जर्सीसाठी नेहमीच संघर्ष केला. फुटबॉलच्या माध्यमातून तुम्हाला आनंद देता येईल, तुम्हाला अर्जेंटिनाचा नागरिक असल्याचा अभिमान वाटावा यासाठी माझ्यापरीने सर्वकाही केलं. हा एक असा अध्याय आहे की सध्याच्या घडीला मला खूपच दुःख होत आहे. राष्ट्रीय संघाचा भाग होणे मला नेहमीच आवडायचे. मी माझं सर्वकाही दिलं. आता माझ्याकडे देण्यासारखं काही नाही. अनेक प्रतिभावान युवा खेळाडू उदयास येत आहेत, असंही त्यानं पोस्टमध्ये नमूद केलं.