Ravindra Jadeja: राजकोट कसोटीत रविंद्र जडेजा खेळणार का? कुलदीप यादवने दिली मोठी अपडेट

Ravindra Jadeja Fitness Update, India vs England 3rd Test:

भारत आणि इंग्लंड यांच्यातील पहिला कसोटी सामना हा हैदराबादच्या मैदानावर पार पडला. या सामन्यात भारतीय संघाला २८ धावांनी पराभवाचा सामना करावा लागला. या सामन्यात रविंद्र जडेजा दुखापतग्रस्त झाला होता.

त्यामुळे तो दुसऱ्या कसोटीत खेळताना दिसून आला नव्हता. दरम्यान तिसऱ्या कासोटीपूर्वी त्याला पूर्णपणे फिट होण्यासाठी १० दिवसांचा अवधी मिळाला. आता तिसऱ्या कसोटीत तो खेळणार की नाही? असा प्रश्न उपस्थित होत असताना कुलदीप यादवने त्याच्या फिटनेसबाबत मोठी अपडेट दिली आहे.

राजकोट कसोटीत जडेजा खेळणार?

भारत आणि इंग्लंड यांच्यातील तिसरा कसोटी सामना राजकोटच्या मैदानावर रंगणार आहे. या सामन्यात रविंद्र जडेजा खेळणार असे संकेत कुलदीप यादवने दिले आहेत. कुलदीप यादवच्या म्हणण्यानुसार रविंद्र जडेजा हा सराव करताना अप्रतिम गोलंदाजी करतोय. दुसऱ्या कसोटीपूर्वी स्नायू ताणले गेल्याने त्याला संघाबाहेर राहावं लागलं होतं. दरम्यान पत्रकार परिषदेत बोलताना कुलदीप यादव म्हणाला की, ' मला वाटतं रविंद्र जडेजा खेळणार. त्याने सराव सत्रात सहभाग घेतला असून तो उपलब्ध आहे.' (Cricket news in marathi)

तसेच तो पुढे म्हणाला की, ' सर्वच गोष्टी महत्वाच्या आहेत. तुम्ही पाहिलच असेल की,वेगवान गोलंदाज आपली भूमिका योग्यरीत्या पार पाडत आहेत. मात्र तुम्हाला यापुढेही टर्निंग विकेट्स पाहायला मिळतील असं मुळीच नाही.' इंग्लंडने सुरुवातीच्या दोन्ही कसोटीत आक्रमक फलंदाजी केलं आहे. पहिला कसोटी सामना भारतीय संघाने २८ धावांनी गमावला होता. तर दुसऱ्या कसोटीत भारतीय संघाने कमबॅक केलं आणि १०६ धावांनी विजय मिळवला.

सध्या ही मालिका १-१ ने बरोबरीत आहे. मालिकेतील तिसरा कसोटी सामना राजकोटच्या मैदानात रंगणार आहे. या कसोटीत भारतीय संघाला विराट कोहली आणि श्रेयस अय्यरसारख्या खेळाडूंच्या अनुपस्थितीत खेळावं लागणार आहे. हा सामना १५ फेब्रुवारीपासून राजकोटच्या सौराष्ट्र क्रिकेट असोसिएशनच्या मैदानावर रंगणार आहे.