आयपीएल २०२४ स्पर्धेचा फायनलचा थरार कोलकाता नाईट रायडर्स आणि सनरायझर्स हैदराबाद या दोन्ही संघांमध्ये रंगणार आहे. चेन्नईतील चेपॉकच्या मैदानावर होणाऱ्या या सामन्यात कोलकाता नाईट रायडर्स संघाला तिसऱ्यांदा तर सनरायझर्स हैदराबाद संघाला दुसऱ्यांदा आयपीएलची ट्रॉफी जिंकण्याची संधी असणार आहे. दरम्यान या सामन्यात कोलकाता नाईट रायडर्स संघातील सलामीवीर फलंदाज सुनील नरेनला एक मोठा रेकॉर्ड आपल्या नावावर करण्याची संधी असणार आहे.
आयपीएल २०२४ स्पर्धेत सुनील नरेन हा कोलकाता नाईट रायडर्स संघासाठी सुपरहिट ठरला आहे. त्याने गोलंदाजी आणि फलंदाजीत आपली भूमिका योग्यरीत्या पार पाडली आहे. दरम्यान अंतिम सामन्यात त्याच्याकडे इतिहास रचण्याची संधी आहे. त्याला आयपीएल स्पर्धेच्या इतिहासात एकाच हंगामात ५०० पेक्षा अधिक धावा आणि १५ गडी बाद करणारा गोलंदाज बनण्याची नामी संधी आहे. हा रेकॉर्ड करण्यासाठी त्याला केवळ १८ धावांची गरज आहे.
आयपीएल २०२४ स्पर्धेत त्याने शानदार कामगिरी केली आहे. त्याने आतापर्यंत खेळलेल्या १३ सामन्यांमध्ये १७९.८५ च्या स्ट्राइक रेटने ४८२ धावा केल्या आहेत. त्याला ५०० धावांचा पल्ला गाठण्यासाठी केवळ १८ धावांची गरज आहे.
यासह त्याला कोलकाता नाईट रायडर्स संघासाठी आणखी एक मोठा रेकॉर्ड करण्याची संधी असणार आहे. ५०० धावा करताच तो गौतम गंभीर, रॉबिन उथप्पा आणि आंद्रे रसलनंतर कोलकाता नाईट रायडर्स संघासाठी एकाच हंगामात ५०० धावा करणारा चौथा खेळाडू ठरणार आहे.
कोलकाता नाईट रायडर्स संघाच्या या हंगामातील कामगिरीबद्दल बोलायचं झालं तर या संघाने साखळी फेरीत ९ सामने जिंकले. तर ३ सामन्यांमध्ये पराभवाचा सामना करावा लागला आणि २ सामने पावसामुळे रद्द झाले. क्वालिफायर १ च्या सामन्यात सनरायझर्स हैदराबादला पराभूत करत या संघाने स्पर्धेतील फायनलमध्ये प्रवेश केला आहे.
Read Marathi news and watch Live TV. Breaking news from Maharashtra, India, Pune, Mumbai, Politics, Entertainment, Sports, Lifestyle at SaamTV. Get Live Marathi news on Mobile. Download the Saam Tv app for Android and IOS.