IPL 2025 : दाल में कुछ काला है! Ishan Kishan च्या विकेटवर यांनाही शंका; पाकिस्तानी खेळाडूने लावला मॅच फिक्सिंगचा आरोप

SRH VS MI IPL 2025 : आयपीएल २०२५ मधील ४१ वा सामना काल सनरायजर्स हैदराबाद आणि मुंबई इंडियन्स यांच्यात खेळला गेला. या सामन्यात इशान किशन फक्त १ धाव करुन तंबूत परतला. बॅटची एज चेंडूला लागली नसतानाही इशानने क्रीज सोडली. दीपक चहरच्या अपीलनंतर अंपायर्संनी इशान आउट आहे अशी घोषणा केली. या सर्व प्रकरणात अंपायरचा गोंधळ झाल्याचे पाहायला मिळाले. एकूण प्रकारामुळे कालच्या सामन्यात फिक्सिंग झाली अशा चर्चा सोशल मीडियावर रंगल्या.

सोशल मीडियावर हैदराबाद विरुद्ध मुंबईची मॅच फिक्स होती असे अनेक मीम्स, पोस्ट व्हायरल झाले. पाकिस्तानचा माजी क्रिकेटपटू जुनैद खानने देखील इशान किशनच्या वादग्रस्त विकेटवर कमेंट केली आहे. त्याने इशानच्या विकेटचा व्हिडीओ एक्सवर पोस्ट करताना त्या व्हिडीओच्या कॅप्शनमध्ये 'दाल में कुछ काला है' असे म्हटले. त्याच्या या व्हिडीओची सोशल मीडियावर चर्चा पाहायला मिळत आहे.

सनरायजर्स हैदराबाद विरुद्ध मुंबई इंडियन्स हा सामना काल एकाना स्टेडियमवर खेळला गेला. टॉस जिंकत हार्दिक पंड्याने प्रथम गोलंदाजी करण्याचा निर्णय घेतला. ट्रेव्हिस हेड शून्यावर बाद झाला. त्याच्या जागी आलेला इशान किशन देखील लवकर बाद झाला. त्याच्या विकेटच्या वेळी मैदानात प्रचंड गोंधळ पाहायला मिळाला.

नेमकं काय झालं?

दीपक चहर तिसऱ्या ओव्हरमध्ये गोलंदाजी करण्यासाठी आला. ओव्हरच्या पहिल्याच चेंडूवर इशानने शॉट मारण्याचा प्रयत्न केला. पण चेंडू थेट विकेटकिपरच्या हातात गेला. अंपायरने सुरुवातीला वाइडचा कॉल दिला. पण इशान किशन क्रीज सोडून जाऊ लागला, तेव्हा चहरने अपील केल्यानंतर अंपायरने किशनला आउट घोषित केले. नंतर जेव्हा रिप्ले दाखवण्यात आला, तेव्हा इशानच्या बॅटला चेंडूचा स्पर्श झाला नसल्याचे समोर आले. इशान किशनचा परतण्याचा निर्णय आणि अंपायरने चुकीचा कॉल यामुळे हा सामना फिक्स होता अशा चर्चा सुरु झाल्या.