Pahalgam Attack : पहलगाममध्ये दहशतवादी हल्ला, पाकिस्तानच्या खेळाडूला पाकिस्तानवरच संशय; एका पोस्टने उडाली खळबळ

Pahalgam Terror Attack : जम्मू-काश्मीरमधील पहलगाम येथे झालेल्या दहशतवादी हल्ल्यात २८ निष्पाप नागरिकांचा मृत्यू झाला. दहशतवाद्यांनी केलेल्या गोळीबारात अनेकजण जखमी झाले. या हल्ल्यामुळे देशभरात संतापाची लाट उसळली आहे. लष्कर-ए-तयबाच्या द रेझिस्टन्स फ्रंटने हा हल्ला केल्याचा दावा केला जात आहे. जगभरातून पहलगाम हल्ल्याचा निषेध होत आहे. पाकिस्तानचा माजी क्रिकेटपटून दानिश कानेरियाने देखील या भ्याड हल्ल्यावर राग व्यक्त केला आहे.

पहलगाम हल्ल्यामध्ये जीव गमावलेल्या मृतकांना त्याने श्रद्धांजली वाहिली. त्यासोबतच त्याने पाकिस्तानचे पंतप्रधान शहबाज शरीफ यांच्यावर गंभीर आरोप देखील केले. 'जर पहलगाम दहशतवादी हल्ल्यात पाकिस्तानचा काही संबंध नसेल, तर पंतप्रधान शहबाज शरीफ अजूनही शांत का आहेत? त्यांनी या हल्ल्याचा अजूनही निषेध का केला नाही?' असे दानिश कनेरिया म्हटले आहे.

'पाकिस्तानचे सैन्य अचानक हाय अलर्टवर का आहे? तुम्ही दहशतवाद्यांना आश्रय देत आहात, त्यांचे पालनपोषण करत आहात. हे तुम्हाला ठाऊक आहे. तुम्हाला लाज वाटली पाहिजे', असे म्हणत दानिशने पाकिस्तानचे पंतप्रधान शहबाज शरीफ यांच्यावर टीका केली आहे. दानिश कानेरियाच्या या एक्स पोस्टची सोशल मीडियावर चर्चा पाहायला मिळत आहे.

दानिश कानेरिया हा पाकिस्तान क्रिकेट संघातील उकृष्ट फिरकीपटूंपैकी एक होता. स्पॉट फिक्सिंग प्रकरणामुळे त्याच्यावर इंग्लंड क्रिकेट बोर्डाने बंदी घातली होती. तो पाकिस्तान संघातील मोजक्या हिंदू क्रिकेटपटूंपैकी एक आहे. हिंदू असल्याने अनेकदा पाकिस्तान क्रिकेटमध्ये संघात त्रास झाला असल्याचे कानेरियाने म्हटले आहे. दानिश कानेरिया त्याच्या कुटुंबासह सध्या अमेरिकेमध्ये वास्तव्याला आहे.