Neeraj Chopra: पॅरिस ऑलिम्पिकआधी गोल्डन बॉय नीरज चोप्राचा धमाका! सुवर्णपदकावर कोरलं नाव |VIDEO

पॅरिस ऑलिम्पिक स्पर्धेचा थरार सुरु व्हायला अवघे काही दिवस शिल्लक राहिले आहेत. ही स्पर्धा सुरु होण्यापूर्वी भारताचा गोल्डन बॉय म्हणून ओळखल्या जाणाऱ्या नीरज चोप्राने दमदार कमबॅक केल्याचे पाहायला मिळाले आहे. ऑलिम्पिकपूर्वी त्याने ८६ मीटर भाला फेकून सुवर्णपदकावर नाव कोरलं आहे. नीरजने पावो नूरमी गेम्स २०२४ स्पर्धेत तिसऱ्या प्रयत्नात ८५.९७ मीटर लांब भाला फेकत सुवर्णपदकावर निशाणा साधला आहे.

ज्यावेळी नीरजने टोकियो ऑलिम्पिक स्पर्धेत सुवर्णपदकावर निशाणा साधला होता त्यावेळी त्याने भाला फेकताच मागे वळून जल्लोष साजरा केला होता. त्यावरुन स्पष्ट झालं होतं की, हा थ्रो त्याने लांब फेकला होता. यावेळीही त्याने असंच काहीतरी केलं. भाला फेकताच त्याने मागे वळून जल्लोष केला. यावरुन स्पष्ट झालं की, हा थ्रो त्याला सुवर्णपदक जिंकून देऊ शकतो. त्याने यावेळी ८६ मीटर लांब भाला फेकला.

या स्पर्धेचे आयोजन तुर्कूमध्ये करण्यात आले होते. या स्पर्धेत त्याने तुर्कूमध्ये राहणाऱ्या ओलीवर हेलेंडरला मागे सोडलं. त्याने पहिल्या प्रयत्नात ८३.६२, दुसऱ्या प्रयत्नात ८३.४५ आणि तिसऱ्या प्रयत्नात ८५.९७ इतका लांब थ्रो केला. त्यानंतर चौथ्या थ्रो मध्ये त्याने भाला फेकला नाही. पाचव्या प्रयत्नात त्याने ८६ मीटर लांब भाला फेकला आणि सुवर्णपदकावर नाव कोरलं. भारतीय फॅन्सला नीरजकडून मोठ्या आशा आहेत. कारण त्याला पॅरिस ऑलिम्पिक स्पर्धेत जेतेपद मिळवण्यासाठी प्रबळ दावेदार मानलं जात आहे.

नीरज चोप्रा ८६ मीटर लांब भाला फेकून अव्वल क्रमांकावर कायम राहिला. तर फिनलँडचा टोनी केरानेन दुसऱ्या स्थानी राहिला. त्याने ८४.१९ मीटर लांब भाला फेकला. तर ओलीवर हेलेंडरला तिसऱ्या स्थानावर समाधान मानावं लागलं.