IND vs BAN: पहिल्या टी-२० साठी कशी असेल टीम इंडियाची प्लेइंग ११? खेळपट्टी कोणाला देणार साथ?

IND vs BAN 1st T20I: भारत आणि बांगलादेश या दोन्ही संघामध्ये आजपासून (६ ऑक्टोबर) ३ टी -२० सामन्यांच्या मालिकेला प्रारंभ होणार आहे. मालिकेतील पहिला सामना ग्वालियरमध्ये रंगणार आहे. यापूर्वी दोन्ही संघांमध्ये २ कसोटी सामन्यांची मालिका पार पडली.

या मालिकेत भारतीय संघाने २-० ने बाजी मारली. दरम्यान पहिल्या टी -२० सामन्यासाठी कशी असेल भारतीय संघाची प्लेइंग ११ आणि खेळपट्टी कोणाला देणार साथ? जाणून घ्या.

कशी असेल खेळपट्टी?

भारताचा मास्टर ब्लास्टर सचिन तेंडुलकरने याच मैदानावर वनडेतील पहिलं दुहेरी शतक झळकावलं होतं. त्यानंतर या मैदानावर एकही आंतरराष्ट्रीय सामना झालेला नाही. आता याच मैदानावर भारत आणि बांगलादेश हे दोन्ही संघ आमनेसामने येणार आहेत. या मैदानावरील खेळपट्टीबद्दल बोलायचं झालं तर, ही खेळपट्टी लाल मातीची असल्याने चेंडूला उसळी मिळेल. त्यामुळे सुरुवातीला गोलंदाजांना चांगली मदत मिळेल. मात्र खेळ जसा पुढे जाईल तसं ही खेळपट्टी फलंदाजीसाठी सोपी होईल.

मॅच प्रेडीक्शन

भारतीय संघाने नुकताच बांगलादेशला कसोटी मालिकेत २-० ने पराभूत केलंय. आता दोन्ही संघ टी -२० मालिकेत भिडणार आहेत. भारतीय संघाची जबाबदारी सूर्यकुमार यादवकडे असणार आहे. याच संघाने श्रीलंकेला श्रीलंकेत जाऊन पराभूत केलं होतं. त्यामुळे या सामन्यातही भारतीय संघाचं पारडं जड असणार आहे.

या सामन्यासाठी अशी असू शकते भारतीय संघाची संभावित प्लेइंग ११

अभिषेक शर्मा, संजू सॅमसन (यष्टिरक्षक), सूर्यकुमार यादव, रियान पराग, नितीश रेड्डी, हार्दिक पंड्या, रिंकू सिंग,रवी बिश्नोई, अर्शदीप सिंग, मयांक यादव, हर्षित राणा.