आशिया कपआधी BCCI मध्ये मोठी घडामोड, अध्यक्ष रॉजर बिन्नी यांचा राजीनामा, राजीव शुक्लांवर मोठी जबाबदारी

आशिया कप २०२५ आधीच बीसीसीआयमध्ये मोठ्या घडामोडी घडत आहेत. बीसीसीआयचे अध्यक्ष रॉजर बिन्नी यांनी पदाचा राजीनामा दिल्याचं मीडिया रिपोर्टमध्ये म्हटलं आहे. उपाध्यक्ष राजीव शुक्लांकडे प्रभारी अध्यक्षपदाची सूत्रे दिली आहेत.

बीसीसीआयचे अध्यक्ष रॉजर बिन्नी यांनी पदाचा राजीनामा दिला आहे. मीडिया रिपोर्टमध्ये हा दावा करण्यात आला आहे. नवीन अध्यक्ष निवडीपर्यंत राजीव शुक्ला हे बीसीसीआयचे हंगामी अध्यक्ष असतील. शुक्ला हे बीसीसीआयचे विद्यमान उपाध्यक्ष आहेत.

दैनिक जागरणने सूत्रांच्या हवाल्यानं वृत्त प्रकाशित केलं आहे. बीसीसीआयच्या शिखर समितीची बैठक ही राजीव शुक्लांच्या अध्यक्षतेखाली झाली. स्पॉन्सरशिपचा मुद्दा या बैठकीच्या अजेंड्यावर होता. त्यात ड्रीम ११ चा करार संपुष्टात येणे आणि पुढील दोन-अडीच वर्षांसाठी नव्याने स्पॉन्सरचा शोध घेण्याबाबत चर्चा झाली.

रिपोर्टनुसार, आशिया कप २०२५ ही स्पर्धा दोन आठवड्यांवर येऊन ठेपली आहे. तोपर्यंत नव्याने स्पॉन्सर मिळणे कठीण आहे, असे मानले जात आहे. रिपोर्टमध्ये सूत्रांच्या हवाल्यानं सांगितलं की, या स्पर्धेला दोन आठवडेही उरले नाहीत. आम्ही प्रयत्न करत आहोत, पण नव्याने निविदा काढणे, कायदेशीर प्रक्रियेचे पालन करणे आणि अन्य तांत्रिक गोष्टींसाठी वेळ लागतो.

शॉर्ट टर्म म्हणजेच केवळ आशिया कपसाठी प्रायोजक शोधण्याच्या प्रश्नावरही सूत्रांनी सांगितले की असं करता येणार नाही. २०२७ च्या वनडे वर्ल्डकपपर्यंत नवीन प्रायोजक मिळवणे यावर लक्ष केंद्रीत करण्यात आले आहे. राजीव शुक्ला हे बीसीसीआयचे नवे अध्यक्ष निवडीपर्यंत कार्यवाहक म्हणून जबाबदारी पार पाडणार आहेत. नव्या कायद्यानुसार, बीसीसीआयला पुढील महिन्यात वार्षिक सर्वसाधारण बैठक बोलावणे तसेच निवडणूकही घ्यायला लागणार आहे, असेही सूत्रांकडून सांगण्यात आले.