BCCI कडून टीम इंडियाचं वेळापत्रक जाहीर; अडीच महिन्यात १२ सामने खेळणार भारतीय संघ

भारतीय क्रिकेट नियामक मंडळाने (BCCI) टीम इंडियाचे देशांतर्गत वेळापत्रक जाहीर केलंय. यावर्षी भारत वेस्ट इंडिज आणि दक्षिण आफ्रिकेचं यजमानपद भूषवणार आहे. वेस्ट इंडिज आणि दक्षिण आफ्रिकेसोबत भारतीय संघ कधी, कुठे आणि किती सामने खेळणार याची माहिती बीसीसीआयने एका निवेदनाने दिली आहे. ऑक्टोबरमध्ये वेस्ट इंडिजचा संघ भारत दौऱ्यावर येणार आहे. भारतासोबत कसोटी मालिका खेळेल.

वेस्ट इंडिजचा हा संघ २०१८ नंतर प्रथमच भारतात कसोटी मालिका खेळण्यासाठी येत आहे. त्यानंतर नोव्हेंबर आणि डिसेंबरमध्ये दक्षिण आफ्रिकेचा संघ भारताचा दौरा करणार आहे. दक्षिण आफ्रिकेचा संघ टीम इंडियासोबत तिन्ही फॉरमॅटमध्ये मालिका खेळेल. टीम इंडिया या दोन देशांसोबत ७९ दिवसांत एकूण १२ सामने खेळणार आहे.

वेस्ट इंडिजसोबत मालिकेचे वेळापत्रक

वेस्ट इंडिजसोबतच्या दोन सामन्यांच्या कसोटी मालिकेची सुरुवात २ ऑक्टोबर ते ६ ऑक्टोबर दरम्यान होईल. पहिली कसोटी अहमदाबादच्या नरेंद्र मोदी स्टेडियमवर होणार आहे. दुसरी कसोटी १० ते १४ ऑक्टोबर दरम्यान कोलकात्याच्या ईडन गार्डन्स स्टेडियमवर खेळवली जाईल.

दक्षिण आफ्रिकेसोबत मालिकेचे वेळापत्रक

टीम इंडिया दक्षिण आफ्रिकेसोबत दोन सामन्यांची कसोटी मालिका खेळणार आहे. पहिला सामना १४ ते १८ नोव्हेंबर दरम्यान होणार आहे. नवी दिल्लीतील अरुण जेटली स्टेडियमवर पहिला कसोटी सामना होणार आहे. दुसरा सामना २२ ते २५ नोव्हेंबर दरम्यान गुवाहाटी येथे होणार आहे.

या मैदानावरील हा पहिलाच कसोटी सामना असणार आहे. टीम इंडिया दक्षिण आफ्रिकेसोबत दोन सामन्यांची कसोटी मालिका खेळेल. यानंतर दोन्ही संघ तीन सामन्यांची एकदिवशीय मालिका खेळतील.

ही मालिका ३० नोव्हेंबर पासून सुरू होईल. पहिला सामना रांची येथे होईल. दुसरा सामना रायपूरमध्ये ३ डिसेंबरला होईल. तर तिसरा सामना ६ डिसेंबरला विशाखापट्टणममध्ये खेळला जाईल. यानंतर ५ सामन्यांची टी-२० मालिका खेळवली जाणार आहे. पहिला सामना ९ डिसेंबरला कटक येथे होईल. दुसरा सामना ११ डिसेंबरला चंदीगडमध्ये, तिसरा सामना १४ डिसेंबरला धर्मशालामध्ये, चौथा सामना १७ डिसेंबरला लखनऊमध्ये आणि शेवटचा सामना १९ डिसेंबरला अहमदाबादमध्ये होणार आहे.