Ajinkya Rahane: चौथ्या पराभवासह अजिंक्य रहाणेला अजून एक मोठा झटका; BCCI ने केली कारवाई

यंदाच्या सिझनमध्ये केकेआरला अजून एकही सामना जिंकता आलेला नाही. ५ सामन्यांपैकी चार सामन्यांमध्ये पराभव झाला असून एका सामन्याचा निकाल लागला नाही. मंगळवारी चिदंबरम स्टेडियमध्ये झालेल्या सामन्यातही केकेआरला पराभवाचा सामना करावा लागला. तर दुसरीकडे केकेआरचा कर्णधार अजिंक्य रहाणेवर कारवाई देखील करण्यात आलीये.

केकेआरचा खराब फॉर्म

या सिझनमध्ये कोलकाता नाइट रायडर्सचा खेळ अजूनही रंगात आलेला नाही. टीमने आतापर्यंत पाच सामने खेळले असून त्यापैकी चार सामन्यांत पराभव स्वीकारावा लागला आहे. पंजाब किंग्सविरुद्धचा सामना पावसामुळे रद्द झाला आणि त्यातून केवळ एक गुण मिळालाय. केकेआरच्या या परिस्थितीमुळे प्लेऑफमधील टॉप 4 मध्ये पोहोचणं आता टीमसाठी खूपच कठीण झालं आहे.

सीएसकेकडून 32 रन्सने पराभव

मंगळवारी चेन्नई सुपर किंग्सविरुद्ध झालेल्या सामन्यात केकेआरला पुन्हा एकदा हार पत्करावी लागली. या सामन्यात सीएसकेने पहिल्यांदा फलंदाजी करताना 20 ओव्हर्समध्ये 192 रन्स केले. प्रत्युत्तरात 193 रन्सचं लक्ष्य गाठताना केकेआरची सुरुवात काही फारशी चांगली झाली नाही. तर 32 रन्सने त्यांना सामना गमवावा लागला आहे. अशातच सामन्याच्या शेवटच्या ओव्हरमध्ये केकेआरचा स्लो ओव्हर रेट असल्याचं स्पष्ट झालं.

रहाणेवर 12 लाखांचा दंड

या स्लो ओव्हर रेटमुळे आयपीएलने कर्णधार अजिंक्य रहाणेवर कारवाई केलीये. चेन्नईच्या एमए चिदंबरम स्टेडियमवर झालेल्या या सामन्यात ओव्हर रेट नियमाचं उल्लंघन झाल्याने आयपीएलच्या आचारसंहितेअंतर्गत रहाणेवर 12 लाख रुपयांचा दंड ठोठावण्यात आला. हा या सिझनमधील टीमचा पहिलाच गुन्हा असल्यामुळे तुलनेने कमी दंड आकारण्यात आलाय.

गुजरातविरूद्ध रंगणार पुढचा सामना

केकेआरचा पुढील सामना 17 एप्रिल रोजी गुजरात टायटन्सविरुद्ध होणार आहे. हा सामना जिंकण्यासाठी टीमवर खूप दबाव असणार आहे. जर पुन्हा एकदा स्लो ओव्हर रेटचा प्रकार घडला तर दंडाची रक्कम वाढून 25 लाखांपर्यंत जाऊ शकते.