Romario Shepherd : नाद करायचा नाय आमचा! पठ्ठ्याने एका चेंडूत कुटल्या २० धावा, एका पाठोमाग ३ षटकार, VIDEO

Caribbean Premier League 2025: कॅरिबियन प्रीमियर लीग २०२५ मध्ये सेंट लूसिया किंग्स आणि गुयाना अमेजन वॉरियर्समध्ये धमाकेदार सामना झाला. या स्पर्धेत आरसीबीचा स्टार खेळाडू रोमारियो शेफर्ड हा गुयाना अमेजन वॉरियर्स टीमचा भाग आहे. या सामन्यात रोमारियोची जबरदस्त खेळी पाहायला मिळाली. रोमारियाने एका चेंडूत २० धावा कुटल्या. तर त्याने एका पाठोपाठ ३ षटकार लगावले. आक्रमक खेळीनंतरही रोमारियाच्या गुयाना अमेजन वॉरियर्सला पराभवाचा सामना करावा लागला.

गुयाना अमेजन वॉरियर्सने प्रथम फलंदाजी करण्याचा निर्णय घेतला. गुयाना अमेजन वॉरियर्ससाठी रोमारिया शेफर्डने ३४ चेंडूत सर्वाधिक ७३ धावा कुटल्या. शेफर्डने फलंदाजी करताना ५ चौकार आणि ७ षटकार लगावला. शेफर्डने १५ व्या षटकात ओसेन थॉमसच्या गोलंदाजीवर जोरदार फटकेबाजी केली.

थॉमसने ओव्हरचा दुसरा चेंडू वाइड टाकला. त्यानंतर पुन्हा नो बॉल टाकला. या नो बॉलवर षटकार लगावला. त्यानंतर आणखी एक नो बॉल टाकला. त्यावरही षटकार लगावला. पुढे थॉमसने व्यवस्थित बॉल टाकला. मात्र, शेफर्डने त्यावरही खणखणीत षटकार लगावला. जोरदार फलंदाजी करत शेफर्डने त्या एका चेंडूत २० धावा कुटल्या.

शेफर्डच्या संघाने दिलेल्या २०३ धावांचं लक्ष्य सेंट लूसिया किंग्सने अवघ्या १८.१ षटकात ६ गडी गमावून गाठलं. सेंट लूसिया किंग्सकडून फलंदाजी करताना एकीमने ३५ चेंडूत ७३ धावा कुटल्या. एकीमने ६ चौकार आणि ४ षटकार लगावले. तर टिम शेफर्टने ३७, टिम डेविडने २५ धावा कुटल्या. सेंट लूसिया किंग्सने ४ गडी राखून सामना जिंकला.