West Bengal : पश्चिम बंगालमध्ये खुनी सत्र सुरु, मुख्यमंत्र्यांच्या PA नंतर TMC नेत्याची हत्या

पश्चिम बंगालमध्ये नुकत्याच निवडणुका पार पडल्या. या निवडणुकांनंतर पुन्हा एकदा राजकीय हिंसाचाराच्या घटनांनी डोके वर काढले आहे. पश्चिम बंगालमधील मुख्यमंत्री सुवेंदू अधिकारी यांच्या पीएच्या हत्येची बातमी ताजी असतानाच आता TMC च्या नेत्याची हत्या करण्यात आल्याची घटना समोर आली आहे. सहदेव बाग (Sahdev Bag Murder Case) असे मृत नेत्याचे नाव असून हुगळी जिल्ह्यातील गोघाट परिसरात त्यांचा मृतदेह आढळून आल्याने मोठी खळबळ उडाली आहे. या घटनेनंतर परिसरात तणावाचे वातावरण निर्माण झाले असून पोलिसांनी तपास सुरू केला आहे.

मिळालेल्या माहितीनुसार, नकुंडा पंचायत अंतर्गत येणाऱ्या कोटा गावात तृणमूल काँग्रेसचे नेते सहदेव बाग यांचा मृतदेह एका पक्ष कार्यालयाजवळील नाल्यात आढळून आला. त्यांच्या चेहऱ्यावर आणि नाकावर गंभीर मारहाणीच्या खुणा दिसून आल्या आहेत. सहदेव बाग हे बेपत्ता होते. रविवारी सकाळी स्थानिक नागरिकांना त्यांचा मृतदेह दिसल्यानंतर ही घटना उघडकीस आली.

सहदेव बाग हे स्थानिक पंचायत सदस्य चीनाबाग यांचे पती होते. त्यांच्या पत्नीने या प्रकरणात भाजपवर गंभीर आरोप केले आहेत. निवडणुकीचे निकाल लागल्यानंतर सहदेव यांना सातत्याने धमक्या दिल्या जात होत्या, असा दावा त्यांनी केला. शनिवारी रात्री सहदेव घरातून बाहेर गेले होते, मात्र ते परतले नाहीत. दुसऱ्या दिवशी सकाळी त्यांचा मृतदेह तृणमूल काँग्रेस कार्यालयाच्या मागच्या बाजूला आढळला. घटनेची माहिती मिळताच पोलिसांनी तातडीने घटनास्थळी धाव घेत मृतदेह ताब्यात घेतला आणि शवविच्छेदनासाठी पाठवला. सध्या पोलिसांकडून तपास सुरू असून स्थानिकांची चौकशी केली जात आहे.

दरम्यान, पश्चिम बंगालमध्ये नव्या सरकारच्या शपथविधीनंतरही हिंसाचाराच्या घटना थांबताना दिसत नाहीत. पूर्व मेदिनीपूर जिल्ह्यातील खेजुरी भागातही शनिवारी रात्री मोठ्या प्रमाणावर जाळपोळ आणि तोडफोडीच्या घटना घडल्या. तृणमूल काँग्रेसचे राष्ट्रीय सरचिटणीस अभिषेक बॅनर्जी यांनी भाजपवर निशाणा साधत, भाजप समर्थकांनी ६० हून अधिक दुकाने जाळल्याचा आरोप केला आहे. राज्यातील वाढत्या हिंसाचारामुळे सामान्य नागरिकांमध्ये भीतीचे वातावरण निर्माण झाले आहे.