West Bengal Result: भाजपची उद्या तातडीची बैठक; मुख्यमंत्र्यांच्या नावावर होणार शिक्कामोर्तब,शपथविधीचीही तारीख ठरणार?

पश्चिम बंगाल विधानसभा निवडणुकीत शानदार विजय मिळवल्यानंतर भाजप अॅक्शन मोडवर आले आले. सत्तास्थापनेच्या हालचाली वाढल्या आहेत, त्याबाबत उद्या मंगळवारी भाजपने बैठक बोलवली आहे. विधिमंडळ पक्षाच्या नेत्याची निवड करण्यासाठी ही महत्त्वपूर्ण बैठक असणार आहे. न्यूटाऊनमधील एका हॉटेलमध्ये ही महत्त्वाची बैठक होणार आहे. या सभेतून विधिमंडळ पक्षाचा नेता कोण असेल आणि पुढील सरकारचा मुख्यमंत्री कोण होईल, याचा निकाल लागणार आहे.

सूत्रांनुसार अमित शाह किंवा राजनाथ सिंह उद्याच्या बैठकीसाठी उपस्थित राहतील अशी शक्यता आहे. विजयी उमेदवारांना कोलकाता येथे बोलावले जाणार आहे. जिथे त्यांच्या उपस्थितीत विधीमंडळ नेत्याची निवड केली जाईल. अमित शाह किंवा राजनाथ सिंह उद्या नवनिर्वाचित आमदारांसोबत नवीन मुख्यमंत्र्यांच्या नावावर चर्चा करतील अशी शक्यता आहे, मात्र याबाबतची अधिकृत घोषणा अजून झाली नाहीये.

बंगालच्या मुख्यमंत्र्यांचा शपथविधी कधी होणार?

दरम्यान नवीन मुख्यमंत्र्यांच्या शपथविधी सोहळ्याबाबत मोठी अपडेट समोर येत आहे. सूत्रांनी दिलेल्या माहितीनुसार, भाजप ९ मे रोजी नवीन मुख्यमंत्र्यांचा शपथविधी सोहळा आयोजन करू शकते. ही तारीख वैशाख महिन्याची २५ तारीख असून तो एक शुभ दिवस मानला जातो. दरम्यान, भाजपच्या विजयानंतर नबन्ना येथे सुरक्षा व्यवस्था कडक करण्यात आली आहे.

नबन्नासह सर्व सरकारी कार्यालयांमध्ये केंद्रीय दले तैनात करण्यात आली आहेत. फायली घेऊन येणाऱ्या-जाणाऱ्या प्रत्येकाच्या येण्या-जाण्यावर बारकाईने लक्ष ठेवले जातंय. कोणत्याही व्यक्तीला फायली घेऊन बाहेर जाऊ देऊ नये,अशा सुचना सुरक्षा रक्षकांना देण्यात आल्या आहेत. दरम्यान विजयानंतर पंतप्रधान मोदींनी कार्यकर्त्यांना संबोधित केले. सत्ता स्थापन होताच भाजपचा अॅक्शन प्लॅन काय असेल याची माहिती दिली आहे.

पहिल्याच मंत्रिमंडळ बैठकीतच आयुष्मान भारत योजनेला मंजुरी दिली जाईल. घुसखोरांवर कठोर कारवाईही केली जाईल, असं मोदी म्हणालेत. बंगालमध्ये आता बदला नाही बदल केला पाहिजे. सर्व पक्षांनी हिंसा सोडली पाहिजे.पंतप्रधान मोदी म्हणाले की, यावेळी पहिल्यांदाच बंगालमध्ये शांततेत निवडणुका पार पडल्या. एकाही निरपराध नागरिकाला आपला जीव गमवावा लागला नाही. बंगालच्या इतिहासात एक नवा अध्याय जोडला गेला. आजपासून बंगाल भयमुक्त झाला आहे.