Weather Update : ४ दिवस १३ राज्यात वादळी वाऱ्यासह पाऊस कोसळणार, महाराष्ट्रात काय स्थिती? वाचा आजचा हवामान अंदाज

महाराष्ट्रासह अनेक राज्यांमध्ये गेले काही दिवस उकाड्याने नागरिक हैराण झाले. देशाची राजधानी दिल्ली येथे तापमान ४५ अंश सेल्सिअसच्या पुढे गेले, तर उत्तर प्रदेशातील बांदा जिल्ह्यात तब्बल ४८ अंश सेल्सिअस तापमानाची नोंद झाली. अशातच आता नागरिकांना दिलासा देणारी बातमी हवामान खात्याने दिली आहे. IMD च्या ताज्या अंदाजानुसार, लवकरच मान्सून दाखल होणार असून अनेक राज्यांत पुढील ३-४ दिवसात वादळी वाऱ्यासह पाऊस पडणार आहे.

हवामान विभागाने बिहार, झारखंड, पश्चिम बंगाल, हिमाचल प्रदेश आणि उत्तराखंडसह अनेक राज्यांमध्ये पावसाचा अंदाज वर्तवला आहे. विशेषतः पश्चिम बंगालमध्ये २१ ते २३ मे दरम्यान पावसासोबतच सोसाट्याच्या वाऱ्याचा इशारा देण्यात आला आहे. बिहारमध्ये २० ते २६ मे दरम्यान विविध जिल्ह्यांमध्ये हलका ते मध्यम पाऊस पडण्याची शक्यता व्यक्त करण्यात आली आहे. झारखंडमध्येही २१ ते २६ मे या कालावधीत पावसाचा अंदाज असून, ओडिशामध्ये २२ ते २४ मे दरम्यान वादळी वाऱ्यासह पावसाची शक्यता वर्तवण्यात आली आहे.

वायव्य भारतातही हवामानात बदल होण्याची चिन्हे दिसत असून, जम्मू-काश्मीर, हिमाचल प्रदेश आणि उत्तराखंडच्या डोंगराळ भागांमध्ये २१ ते २३ मे दरम्यान मेघगर्जनेसह पावसाची शक्यता आहे. या भागांमध्ये ताशी ४० ते ५० किमी वेगाने वारे वाहण्याचा अंदाज आहे. दक्षिण भारतातही पावसाची सक्रियता वाढणार असून, तामिळनाडू, पुदुचेरी, केरळ, माहे आणि कराईकल येथे २१ ते २४ मे दरम्यान मुसळधार पावसाचा इशारा देण्यात आला आहे.

महाराष्ट्रात देखील येत्या ५ ते ६ जून दरम्यान मान्सून दाखल होणार आहे. तसेच वादळी पावसाची शक्यता वर्तवण्यात आली आहे. राज्यातील कोकण आणि मध्य महाराष्ट्रात आज मुसळधार पावसाचा इशारा देण्यात आला असून उर्वरित जिल्ह्यांमध्ये तपमानात वाढ पाहायला मिळत आहे. दरम्यान मुंबईतील वातावरण ३४ अंश सेल्सिअसवर आले असून मुंबईकरांना काहीसा दिलासा मिळाला आहे.

तेलंगणामध्येही विजांच्या कडकडाटासह हलका ते मध्यम पाऊस अपेक्षित आहे. एकीकडे उष्णतेची लाट त्रास देत असताना, दुसरीकडे पावसाचा हा अंदाज नागरिकांसाठी काहीसा दिलासादायक ठरत आहे. मात्र, बदलत्या हवामानामुळे नागरिकांनी सतर्क राहून आवश्यक ती काळजी घेणे गरजेचे आहे.