Viral News : अजब लग्नाची गजब गोष्ट! एकत्र राहण्यासाठी ३ सख्ख्या बहिणींनी एकाच नवरदेवाशी केला विवाह

उत्तर प्रदेशात घडणारे गुन्हे आपण नेहमीच ऐकत आलो आहोत. मात्र उत्तर प्रदेशातील अमरोहा जिल्ह्यात सध्या एका लग्नाची चर्चा आहे. एका तरुणाने एकाच वेळी तीन बहिणींशी लग्नगाठ बांधली. या लग्नाचा व्हिडिओ सोशल मीडियावर व्हायरल होत आहे. तुम्हालाही वाचून आश्चर्य वाटलं ना? हे नेमकं काय प्रकरण आहे जाणून घ्या सविस्तर

मिळालेल्या माहितीनुसार, हसनपूर परिसरातील धौरिया गावातील सरोज, सावित्री आणि संतोष या तिघी बहिणी सोशल मीडिया इन्फ्लुएन्सर म्हणून ओळखल्या जातात. त्या इन्स्टाग्राम आणि फेसबुकवर दररोज वेगवेगळ्या व्हिडिओ तयार करून मनोरंजन करतात. त्यांच्या व्हिडिओंचे चित्रीकरण करणारा विकास उर्फ विकू हा गेल्या सहा महिन्यांपासून त्यांच्यासोबत कॅमेरामन म्हणून काम करत होता. चित्रीकरणादरम्यान त्यांच्यात जवळीक निर्माण झाली आणि अखेर चौघांनी विवाहाचा निर्णय घेतल्याचे सांगितले जात आहे.

व्हायरल झालेल्या व्हिडिओमध्ये तिन्ही बहिणी एकाच वेळी विकासच्या गळ्यात वरमाला घालताना दिसतात. त्यानंतर विकास तिन्ही बहिणींच्या भांगात सिंदूर भरतानाही दिसतो. हा विवाह १७ जुलै रोजी चामुंडा माता मंदिरात झाल्याचा दावा केला जात आहे. तिन्ही बहिणींनी एका व्हिडिओद्वारे हा निर्णय त्यांच्या स्वेच्छेने घेतल्याचे स्पष्ट केले आहे. लहानपणापासून त्या कायम एकत्र राहिल्या असून, लग्नानंतरही वेगळे राहायचे नव्हते. त्यामुळे एकाच व्यक्तीशी विवाह करण्याचा निर्णय घेतल्याचे त्यांनी सांगितले. विकासनेही तिघींच्या इच्छेचा आदर करून हा निर्णय स्वीकारल्याचे म्हटले आहे.

हसनपूर कोतवालीचे प्रभारी राजेश कुमार तिवारी यांनी सांगितले की, या प्रकरणाची माहिती सोशल मीडियाच्या माध्यमातून मिळाली आहे. संबंधित विवाह प्रत्यक्षात झाला की तो केवळ व्हिडिओसाठी करण्यात आला होता, याची अद्याप खात्री झालेली नाही. तसेच, या संदर्भात कोणतीही लेखी तक्रार प्राप्त झालेली नसून, तक्रार मिळाल्यास नियमानुसार चौकशी केली जाईल, असे त्यांनी स्पष्ट केले.