Avalanche Near Siachen : दुर्दैवी घटना! हिमस्खलनात भारतीय लष्कराचे ३ जवान शहीद

लडाखच्या सियाचिनजवळ हिमस्खलनात भारतीय लष्कराचे तीन जवान शहीद झाले. त्यात दोन अग्निवीर आहेत. हिमस्खलनात चौकी दबली. याच चौकीत तीन जवान गस्तीवर होते. लष्कराकडून तात्काळ बचावकार्य हाती घेण्यात आले आहे. हे तिन्ही जवान महार रेजिमेंटचे होते. ते मूळचे गुजरात, उत्तर प्रदेश आणि झारखंडमधील रहिवासी होते.

हिमस्खलनात आणखी पाच जवान अडकले आहेत. एका कॅप्टनना वाचवण्यात यश आले आहे. या घटनेनंतर लष्कराने बचावकार्य हाती घेतले आहे.

अधिकाऱ्यांनी दिलेल्या माहितीनुसार, रविवारी साधारण १२ हजार फूट उंचावरील सियाचिनमध्ये हिमस्खलन झालं. त्यात दोन अग्नीवीरांसह तीन सैनिक अडकले. त्यानंतर तात्काळ बचावकार्य हाती घेण्यात आले. हिमस्खलनात अडकलेल्या तिन्ही जवानांचे मृतदेह बाहेर काढण्यात आले. याबाबत अधिक माहिती घेण्यात येत आहे.

बचावकार्य युद्धपातळीवर

अधिकाऱ्यांनी दिलेल्या माहितीनुसार, बचावकार्य युद्धपातळीवर राबवण्यात आले. तेथील परिस्थितीशी सामना करण्यासाठी विशेष पथके तैनात करण्यात आली आहेत. भारतीय लष्कराकडून या भागात तैनात सैनिकांच्या सुरक्षिततेसाठी सुरक्षा प्रोटोकॉलची समीक्षा करण्यात येत आहे.

याआधी २०२१ मध्ये हनीफ भागात हिमस्खलनाची घटना घडली होती. त्यात दोन जवान शहीद झाले होते. या घटनेनंतर बचावकार्य राबवण्यात आले. सहा तासांच्या रेस्क्यू ऑपरेशननंतर अन्य सैनिकांना सुरक्षित बाहेर काढण्यात आले. २०१९ मध्येही १८००० फूट उंचावरील एका चौकीजवळ गस्त घालणाऱ्या चार सैनिकांसह अन्य दोन जणांचा हिमस्खलनात मृत्यू झाला होता. २०१६ मध्येही १९६०० फूट उंचावर हिमस्खलनाची दुर्घटना घडली होती. त्याखाली १० जवान दबले गेले होते.