Tamil Nadu Election 2026 : निकालानंतर थलपती विजय मोठा निर्णय घेणार; आमदारकीचा राजीनामा देणार, कारण काय?

तामिळनाडूच्या विधानसभा निवडणुकीत मोठी उलथापालथ झाली आहे. अभिनेता थलपती विजय यांच्या तामिळगा वेत्री कळघम पक्षाने जोरदार मुंसडी मारली. दोन वर्षांपूर्वी स्थापन झालेल्या 'टीव्हीके'ने प्रस्थापित द्रविडियन पक्षांना जोरदार धक्का दिला. पहिल्याच निवडणुकीत १०८ जागा जिंकून मागील ६ दशके पाय रोवून राजकारण करणाऱ्या DMK आणि AIADMK पक्षाच्या वर्चस्वाला सुरूंग लावला. विधानसभेचा निकाल लागल्यानंतर आता थलपती विजय मोठा निर्णय घेणार आहेत.

तामिळनाडू विधानसभेत दमदार कामगिरी केल्यानंतर 'टीव्हीके'चे प्रमुख थलपती विजय तामिळनाडूच्या मुख्यमंत्रि‍पदी बसणार असल्याची चर्चा आहे. या निवडणुकीत विजय यांनी दोन जागेतून निवडणूक लढवली होती. दोन्ही मतदारसंघातून विजय यांनी मोठ्या मताधिक्याने विजय मिळवला.

विजय यांनी पेरंबूर येथून 'डीएमके'च्या आर.डी. शेखर यांचा 53,715 मतांनी दारुण पराभव केला. निकालानंतर विजय हे पोरंबूर येथील जागा स्वत:कडे कायम ठेवण्याची शक्यता व्यक्त केली जात आहे. तर तिरुचिरापल्ली - पूर्व (Trichy East) मतदारसंघात 'डीएमके'च्या इनिगो इरुदयाराज यांचा 27,416 मतांनी पराभव केला. विजय हे कमी फरकाच्या मतांनी विजयी झालेल्या मतदारसंघातील आमदारकीचा राजीनामा देण्याची शक्यता आहे.

तामिळनाडू विधानसभेत एकूण २३४ मतदारसंघ आहेत. त्यापैकी 'टीव्हीके' पक्षाने १०८ जागांवर विजय मिळवला. परंतु त्यांना ११८ ही बहुमताचा आकडा गाठता आला नाही. सत्ता स्थापन करण्यासाठी थलपती विजय यांचा पक्ष या विधानसभा निवडणुकीत काँग्रेस, डावे पक्षांसोबत वाटघाटी करण्याची शक्यता व्यक्त केली जात आहे. तर या विधानसभा निवडणुकीत डीएमके ५९ तर AIADMK पक्षाला ४७ जागा जिंकता आल्या.

तामिळनाडूमधील पेरंपूर हा उत्तर चेन्नईचा भाग आहे. त्यात हा भाग DMK पक्षाचा बालेकिल्ला मानला जातोय. मात्र, थलपती विजय यांनी DMK पक्षाच्या बालेकिल्याला सुरूंग लावला. विजय हे लोकप्रियतेच्या जीवावर मतदारांना वळवण्यात यशस्वी ठरले. तामिळनाडूतील मतदारांनीही थलपती विजय यांच्या 'टीव्हीके' पक्षाच्या पारड्यात भरभरून मते टाकली.