Shocking News: सरकारी अधिकाऱ्याच्या घरात सापडलं कोट्यवधींचं घबाड; नोटा मोजताना मशीन बंद, अधिकारीही थकले

Telangana Officials ACB action

मागील काही दिवसांपासून देशभरातील भ्रष्ट नेते, सरकारी अधिकारी तसेच कर्मचारी लाचलुचपत प्रतिबंधक विभागाच्या रडारवर आहेत. लाच घेण्यासाठी अनेकदा सरकारी अधिकारी खासगी व्यक्तीचा देखील वापर करताना दिसून येत आहे. यासंदर्भात तक्रारी प्राप्त झाल्यानंतर ACB अशा लाचखोर अधिकाऱ्यांवर छापेमारी केली जात आहे. या छापेमारीत कोट्यवधी रुपयांचं घबाड सापडत आहे. ('साम टीव्ही'चं व्हॉट्सअ‍ॅप चॅनल जॉईन करण्यासाठी येथे क्लिक करा)

तेलंगणाच्या लाचलुचपत प्रतिबंधक विभागाने (ACB) बुधवारी (२४ जानेवारी) एका सरकारी अधिकाऱ्याच्या घरी तसेच कार्यालयावर एकाच वेळी धाडी टाकल्या. यावेळी ACB पथकाला कोट्यवधींचं घबाड सापडलं. पैशांची रक्कम इतकी होती, की नोटा मोजताना ACB पथकाला देखील घाम फुटला.

बुधवारी रात्री उशिरापर्यंत ही कारवाई सुरू होती. एस. बालकृष्ण असं लाचखोर अधिकाऱ्याचं नाव असून त्याच्याकडे सुमारे १०० कोटी रुपयांचं घबाड सापडलं आहे. एस. बालकृष्ण हा तेलंगणा राज्य रिअल इस्टेट रेग्युलेटरी अथॉरिटी (TSRERA) चा सचिव आणि मेट्रो रेल्वेचे नियोजन अधिकारी पदावर कार्यरत आहे. (Latest Marathi News)

बालकृष्ण याच्याविरोधात लाचलुचपत प्रतिबंधक विभागाला अनेक तक्रारी प्राप्त झाल्या होत्या. त्यानुसार, पथकाने बुधवारी भल्यापहाटे त्याच्या घरासह २० ठिकाणांवर एकाचवेळी धाडी टाकल्या. तसेच कार्यालयावर एसीबीच्या पथकांनी एचएमडीए आणि रेरा कार्यालयांची झडती घेतली.

यावेळी बालकृष्ण याच्याकडे १०० कोटी रुपयांहून अधिक बेनामी संपत्ती सापडली. यात ४० लाख रुपये रोख, २ किलो सोने, चल-अचल मालमत्तेची कागदपत्रे, ६० महागडी घड्याळे, १४ मोबाईल फोन आणि १० लॅपटॉपचा समावेश आहे.

दरम्यान, बालकृष्ण याच्या नावे ४ बँकेत लॉकर्स देखील आहे. गुरुवारी ते एसीबी पथकाकडून उघडले जाण्याची शक्यता आहे. याशिवाय एसीबीच्या बालकृष्ण याच्या घरी कॅश मोजण्याचे यंत्र सापडले आहे. एचएमडीएमध्ये काम केल्यानंतर अधिकाऱ्याने ही बेनामी संपत्ती कमावली होती, अशी माहिती मिळतेय.