Arrested : राजकारणात मोठी खळबळ! 'त्या' पक्षाच्या प्रमुखाला मध्यरात्री अटक; 'हे' ठरलं कारण

Tej Pratap Yadav Arrest : बिहारच्या राजकारणात मध्यरात्री एकच मोठी खळबळ उडाली आहे. राष्ट्रीय जनता दलाचे (RJD) नेते आणि लालू प्रसाद यादव यांचे सुपुत्र तेज प्रताप यादव यांना पोलिसांनी अचानक मध्यरात्री सिटी सेंटर मॉलजवळ ताब्यात घेत अटक केली. अचानक झालेल्या या कारवाईमुळे राजकीय वर्तुळात एकच खळबळ उडाली. तेज प्रताप यादव यांच्या समर्थकांनी पोलीस ठाण्याबाहेर गर्दी करत जोरदार घोषणाबाजी सुरू केली. नक्की कोणत्या प्रकरणात ही कारवाई झाली, याविषयी अनेक तर्कवितर्क लढवले जात आहेत.

जनशक्ती जनता दल (जेजेडी) प्रमुख तेज प्रताप यादव यांना शनिवारी (२५ जुलै) रात्री उशिरा पाटणा येथे पोलिसांनी अटक केली. पाटण्यातील आंदोलकांना चिथावणी दिल्याचा आणि भडकवल्याचा आरोप तेज प्रताप यादव यांच्यावर आहे. शनिवारी बिहार बंददरम्यान पाटण्यातील एका आंदोलनात माजी मंत्री सहभागी झाले होते, जिथे हिंसक निदर्शने उसळली होती. त्या प्रकरणात तेज प्रताप यादव यांना अटक करण्यात आली आहे.

मी विद्यार्थ्यांच्या हक्कांसाठी माझा जीवही देईन

याआधी तेज प्रताप यादव पाटण्यातील रामगुलाम चौकात धरणे आंदोलन करणाऱ्या आंदोलकांमध्ये सामील झाले. त्यानंतर लगेचच, पोलिसांनी त्यांना ताब्यात घेऊन जबरदस्तीने एका वाहनात बसवले. वाहनाचा दरवाजा धरून घेऊन जात असताना यादव म्हणाले, "आम्ही विद्यार्थ्यांच्या खांद्याला खांदा लावून उभे आहोत. गरज पडल्यास, मी विद्यार्थ्यांच्या हक्कांसाठी माझ्या प्राणांचे बलिदान देण्यास तयार आहे."

दगडफेकीचा आरोप

आंदोलकांवर पोलिसांवर दगडफेक केल्याचा आरोप आहे. पोलिसांची वाहने उलटवण्यात आली आणि प्रचंड गोंधळ उडाला. पेपरफुटीच्या निषेधार्थ आणि माजी केंद्रीय शिक्षण मंत्री धर्मेंद्र प्रधान यांच्या राजीनाम्याच्या मागणीसाठी विद्यार्थी संघटना AISA आणि RYA यांनी आज बिहार बंदची हाक दिली होती. आंदोलकांना चिथावणी दिल्याचा आणि भडकवल्याचा आरोप तेज प्रताप यादव यांच्यावर आहे, त्या प्रकरणात त्यांना अटक करण्यात आली. दंडाधिकाऱ्यांनी तेजप्रताप यादव यांना १४ दिवसांची न्यायालयीन कोठडी सुनावली. तेज प्रताप यादव यांना त्यांच्या राजकीय कारकिर्दीत तुरुंगवास होण्याची ही पहिलीच वेळ आहे.