भयंकर! रेल्वेची स्कूल बसला जबर धडक, ३ चिमुकल्यांचा जागीच मृत्यू, अनेकजण जखमी

Tamil Nadu school bus train accident : तामिळनाडूमधून अपघाताची एक हादरवणारी बातमी समोर आली आहे. कडलूर जिल्ह्यामध्ये रेल्वे क्रॉसिंगवर ट्रेनने स्कूल बसला जोरात धडक दिली. या अपघातात तीन चिमुकल्यांचा जागीच मृत्यू झाला आहे, तर अनेक विद्यार्थी जखमी झाले आहेत. जखमींना उपचारासाठी जवळच्या रूग्णालयात दाखल करण्यात आले आहे. स्कूल बस चालकाच्या चुकीमुळे हा अपघात झाल्याची प्राथमिक माहिती समोर आली आहे. मिळालेल्या माहितीनुसार, फाटक नसलेल्या रेल्वे क्रॉसिंगवर हा अपघात झाला. चालकाच्या निष्काळजीपणामुळे ही दुर्दैवी घटना घडल्याचे प्रथामिक तपासातून समोर आले आहे. अपघातानंतर लोकांचा राग अनावर आला अन् मोर्चा काढण्यात आला. रेल्वे क्रॉसिंगवर सुरक्षा कमी असल्यामुळे हा अपघात झाल्याचा पालकांनी आरोप केला आहे. या घटनेचा तपास रेल्वे आणि स्थानिक पोलिसांकडून करण्यात येत आहे. (School children dead in train accident)

तामिळनाडूमधील कडलूर जिल्ह्यातील चेम्मनकुप्पम परिसरात आज सकाळी हा दुर्दैवी अपघात झालाय. वेगात असेल्या ट्रेनने स्कूल बसला जोरात धडक दिली. रेल्वे फाटक नाही, त्यात सुरक्षा रक्षकही नव्हते, बस चालकाने निष्काळजीपणा करत वेगात रेल्वे रूळ पार करण्याचा प्रयत्न केला. पण रेल्वे अतिशय वेगात होती, त्यामुळे हा अपघात झालेला असू शकतो, असे स्थानिकांनी सांगितलेय. या भयंकर अपघातामध्ये तीन निरागस मुलांचा मृत्यू झाला आहे. १० मुले आणि चालक गंभीर जखमी झाले आहेत, जखमींवर जवळच्या रूग्णालयात उपचार सुरू आहे. मृताची संख्या आणखी वाढण्याची भीती व्यक्त करण्यात येत आहे.

रेल्वेने इतक्या जोरात धक्का दिला की स्कूल बस ५० ते ७० मीटरपर्यंत घासत गेल्याचे प्रथमदर्शीने सांगितले. ट्रेनची धडक इतकी जोरात होती, की व्हॅनचा चक्काचूर झाला आहे. या अपघाताची माहिती मिळताच पोलीस आणि बचावपथकाने घटनास्थळी धाव घेतली. जखमींना तात्काळ उपचारासाठी रूग्णालयात दाखल करण्यात आले आहे. काही मुलांची प्रकृती गंभीर जखमी असल्याचे सांगण्यात येत आहे. त्यामुळे मृताची संख्या वाढण्याची भीती व्यक्त करण्यात येत आहे.

चालकाच्या निष्काळजीपणामुळे अपघात

स्थानिक लोक आणि रेल्वे अधिकाऱ्यांच्या मते, हा अपघात स्कूल बस चालकाच्या निष्काळजीपणामुळे झाला. चालकाने रेल्वे दिसूनही घाईघाईने रुळ ओलांडण्याचा प्रयत्न केला. रेल्वे संरक्षण दल (RPF) आणि जिल्हा प्रशासनाने अपघाताच्या तपासाला सुरुवात केली आहे. दुर्दैवी अपघाताची बातमी पसरताच परिसरात शोक आणि संतापाचे वातावरण पसरले. स्थानिक लोक घटनास्थळी जमले आणि रेल्वे क्रॉसिंगवर सुरक्षिततेच्या उपाययोजनांच्या कमतरतेबद्दल नाराजी व्यक्त केली.