सरकारी अधिकाऱ्याच्या हत्येप्रकरणी माजी नगरसेवकाला जन्मठेप; कोर्टाचा निकाल

दिल्लीतील कडकडडूमा न्यायालयाने आम आदमी पक्षाचे माजी नगरसेवक ताहिर हुसेन यांना जन्मेठेपेची शिक्षा सुनावली आहे. 2020 मध्ये दिल्लीच्या उत्तर-पूर्वच्या दिल्लीतील दंगलीदरम्यान गुप्तचर विभागाच्या अधिकारी अंकित शर्मा यांच्या हत्येप्रकरणी न्यायालयाने ताहिर हुसेन यांना दोषी ठरवले होते. शिक्षा सुनावल्यानंतर सर्व दोषीनी एकच हंबरडा फोडला, तर कोर्टाबाहेर त्यांच्या कुटुंबियांचाही आक्रोश पाहायला मिळाला. या प्रकरणात दिल्ली पोलिसांनी दोषीना फाशीची शिक्षा देण्याची मागणी केली होती.

कोर्टाने 13 जुलैला ताहिर हुसेन, नाझिम, काशिम ,अनस आणि जावेद यांना हत्या, अपहरण, दंगल करण्याच्या आरोपांमध्ये दोषी ठरवले होते. तर 11 आरोपांपैकी 6 जणांना निर्दोष मुक्त करण्यात आले आहे. ही केस दयालपूर पोलिस ठाण्यात अंकित शर्मा यांचे वडील रविंदर कुमार यांच्या तक्रारीवरून नोंदवण्यात आली होती. 25 फेब्रुवारी 2020 रोजी अंकित शर्मा ऑफिसमधून घरी आल्यानंतर पुन्हा बाहेर गेले मात्र बराच वेळ होऊनही ते घरी परतले नाही.

यानंतर कुटुंबीय त्यांचा शोध घेत असताना काही लोकांनी त्यांची हत्या करून मृतदेह चांदबाग पुलाजवळील खजुरी खास नाल्यात फेकल्याची माहिती दिली, दुसऱ्या दिवशी सकाळी पोलिसांनी नाल्यातून त्यांचा मृतदेह बाहेर काढला. रवींदर कुमार यांनी थेट आम आदमी पक्षाचे नगरसेवक ताहिर हुसेन आणि त्यांच्या सहकऱ्यांनी आपल्या मुलाची हत्या केल्याचा आरोप त्यांनी केला होता. या प्रकरणात नाव समोर आल्यानंतर आम आदमी पक्षाने ताहिर हुसेन यांना निलंबित केले होते, 24 मार्च 2023 रोजी कोर्टाने ताहिर हुसेनसह 11 आरोपींविरुद्ध आरोप निश्चित केले होते.

23 फेब्रुवारी 2020 रोजी नागरिकत्व दुरुस्ती कायदा (CAA) विरोधक आणि समर्थक आमनेसामने आले होते. त्यानंतर दोन्ही बाजूंनी दगडफेक सुरू झाली आणि परिस्थिती चिघळली. 26 फेब्रुवारीपर्यंत चाललेल्या या दंगलीत 53 जणांचा मृत्यू झाला तर 250 हून अधिक जखमी झाले. मृतांमध्ये 38 मुस्लिम आणि 15 हिंदूंचा समावेश होता. सुमारे 800 दुकाने जाळण्यात आली, तर 500 हून अधिक घरे जाळली गेली.