'धोकादायक कुत्र्यांना इंजेक्शन देऊन मारा', सुप्रीम कोर्टाचे निर्देश

Supreme Court stray dog order Latest news : भटक्या कुत्र्यांच्या वाढत्या दहशतीवर आता सर्वोच्च न्यायालयाने महत्त्वपूर्ण निकाल दिलाय. धोकादायक कुत्र्यांना थेट मारण्याचे आदेशच सुप्रीम कोर्टानं दिले आहेत. श्वानप्रेमींच्या याचिका फेटाळताना सुप्रीम कोर्टानं संबंधित यंत्रणांची कशी कान उघाडणी केलीय पाहूयात. या रिपोर्टमधून.

भटक्या कुत्र्यांच्या वाढत्या दहशतीवर आता सर्वोच्च न्यायालयाने महत्त्वपूर्ण निकाल दिलाय. सार्वजनिक ठिकाणांहून कुत्र्यांना हटवण्याच्या नोव्हेंबर 2025 च्या आदेशात बदल करण्यास न्यायालयानं स्पष्ट नकार दिलाय. इतकंच नव्हे तर सर्वोच्च न्यायालयानं प्राणी प्रेमींच्या सर्व याचिका फेटाळून लावल्यात. तसंच, जमिनीवरील वास्तवाकडे आम्ही डोळेझाक करू शकत नाही. लहान मुलांसह वृद्धांच्या सुरक्षेला आम्ही सर्वोच्च प्राधान्य देतो, असंही न्यायालयानं नमूद केलंय. दरम्यान, भटक्या कुत्र्यांसंदर्भात सर्वोच्च न्यायालयानं काय निर्देश दिले आहेत पाहूयात...

भटक्या कुत्र्यांबाबत सुप्रीम कोर्टाचे निर्देश

- धोकादायक कुत्र्यांना इंजेक्शन देऊन मारा

- शाळा, रुग्णालयं, बस आणि रेल्वे स्थानकांतून भटक्या कुत्र्यांना तातडीनं हटवा

- पकडलेल्या कुत्र्यांना शेल्टर होममध्ये पाठवा, पुन्हा त्याच ठिकाणी सोडू नका

- कुत्र्यांची संख्या मर्यादित करण्यासाठी पुनर्वसन आणि नसबंदीचा जुना निर्णय कायम

- महामार्ग आणि एक्स्प्रेसवेवरील अपघात टाळण्यासाठी कुत्र्यांना हटवण्याचे NHAIला निर्देश

खरंतर, गेल्या काही दिवसांपासून भटक्या कुत्र्यांच्या हल्ल्यांचे प्रमाण वाढलंय. भटक्या कुत्र्यांच्या वाढत्या संख्येला आळा घालण्यासाठी सातत्यपूर्ण प्रयत्नांचा अभाव असल्यानं न्यायालयाने तीव्र चिंता व्यक्त केली. इतकंच नव्हे तर निर्देशांचे पालन न करणाऱ्या अधिकाऱ्यांवर कारवाई केली जाईल, असा इशाराही दिलाय. त्यामुळे आतातरी भटक्या कुत्र्यांच्या नियंत्रणाबाबत संबंधित यंत्रणा कारवाई करणार का, याकडे सगळ्यांचं लक्ष लागलंय.

ब्युरो रिपोर्ट, साम टिव्ही न्यूज