Shubanshu Shukla : 'माझ्या खांद्यावर माझा तिरंगा आहे'; शुभांशू शुक्ला यांनी अंतराळातून दिला मेसेज; आईचे डोळे पाणावले

सुप्रीम मस्कर, साम टिव्ही

नासाचं केनेडी स्पेस सेंटर दुपारचे 12 वाजून 1 मिनिट, एक्सिओम-4 मिशनसाठी स्पेसएक्सचं 'ड्रॅगन' यान अंतराळात झेपावलं या यानाचे पायलट होते भारतीय अंतराळवीर शुभांशू शुक्ला. मात्र त्याचवेळी हजारो किलोमीटर अंतरावर मुलाच्या शाळेत बसून, अंतराळात झेपवणाऱ्या आपल्या मुलाला पाहून शुभांशू यांच्या आईच्या डोळ्यातून आनंदाअश्रू वाहू लागले.

ऍक्सिओम -4 मिशन हे भारतासाठी खूप महत्त्वाचं आहे. कारण शुंभाशू शुक्ला हे अवकाशात स्थानकात जाणारे पहिले आणि राकेश शर्मांनंतर अंतराळात जाणारे दुसरे भारतीय ठरलेत. त्यामुळे अंतराळात गेल्यावर त्यांनी देशवासियांना काय संदेश दिलाय पाहूयात.

माझ्या प्रिय देशवासियांनो, What a ride...41 वर्षांनंतर आपण पुन्हा अंतराळात पोहोचलोय. कमाल राईड आहे. यावेळी आम्ही 7.5 किमी प्रतिसेकंद गतीनं पृथ्वीच्या भोवती फिरतोय. माझ्या खांद्यावर माझा तिरंगा आहे. मी एकटा नाही, तुम्ही सगळे सोबत आहात हेच तो तिरंगा सांगतोय. माझ्या आंतरराष्ट्रीय स्पेस स्टेशनपर्यंतच्या प्रवासाची सुरुवात नाही तर भारताच्या मानवासह स्पेस कार्यक्रमाची सुरुवात आहे. सर्व देशवासियांनी या प्रवासाचा हिस्सा बनावं अशी माझी इच्छा आहे. तुम्हाला गर्व असायला हवा. तुम्हीही तेवढाच उत्साह दाखवा. आपण सगळे मिळून भारताच्या मानवासह स्पेस प्रवासाची सुरुवात करु...जय हिंद, जय भारत

कोण आहेत शुभांशु शुक्ला?

शिक्षण राष्ट्रीय संरक्षण प्रबोधिनी (NDA)मधून पूर्ण

भारतीय हवाई दलातील एक अनुभवी फायटर पायलट

मिग-21 पासून ते सुखोईसारख्या अत्याधुनिक जेट विमानांना उडवण्याचा अनुभव

भारताच्या महत्त्वाकांक्षी गगनयान मोहिमेचा एक भाग

गगनयान मोहिमेसाठी रशिया आणि अमेरिकेत विशेष प्रशिक्षण

भारताच्या अंतराळ संशोधनाला नवी दिशा

शुभांशु शुक्ला अंतराळात करणार 7 प्रयोग

सूक्ष्म गुरुत्वाकर्षणात अंकुरांचे अंकुरणे, पिकांच्या बियाण्यांवर संशोधन

शेवाळावरील सूक्ष्म गुरुत्वाकर्षण, किरणोत्सर्गाचा परिणामासारख्या संशोधन प्रकल्पांचा समावेश

स्नायूंच्या ऱ्हासाच्या कारणांचा अभ्यास आणि उपाय शोधण्यासाठी इन्सेटमचा प्रयोग

डिजिटल स्क्रीन्सवरील मानवी प्रतिक्रिया आणि तणाव पातळीचा अभ्यास

भारतीय अंतराळवीर शुंभाशु शुक्ला एक्सिओम-4 मिशनसाठी रवाना झाल्यानं भारतीयांसाठी हा नक्कीच ऐतिहासिक दिवस आहे. त्यांचा हा प्रवास भारताच्या अंतराळ संशोधन क्षेत्राला एक नवा आत्मविश्वास देतोय. केवळ इस्रोच नव्हे, तर हवाई दल आणि संपूर्ण देशाच्या वैज्ञानिक यशाचा तो परिपाक आहे. त्यांच्या झेपेमुळे लाखो तरुणांना प्रेरणा मिळेल आणि भारताचं नाव पुन्हा एकदा जगाच्या अवकाश नकाशावर चमकणार हे निश्चित...