धक्कादायक! व्यायाम करताना पोलीस कर्मचाऱ्याला जिममध्ये हार्ट अटॅक; जागेवरच दुर्दैवी मृत्यू, थरारक व्हिडीओ समोर

जिममध्ये व्यायाम करताना हृदयविकाराचा झटका (Heart Attack) येऊन मृत्यू होण्याच्या घटनांमध्ये चिंताजनक वाढ होत आहे. अशीच एक अत्यंत धक्कादायक आणि दुर्दैवी घटना पुन्हा एकदा समोर आली असून, यामध्ये एका पोलीस कर्मचाऱ्याचा जिममध्ये वर्कआऊट करताना जागेवरच मृत्यू झाला. व्यायाम करत असताना अचानक छातीत कळा आल्याने हा पोलीस कर्मचारी जमिनीवर कोसळला. ही संपूर्ण थरारक घटना जिममधील सीसीटीव्ही (CCTV) कॅमेऱ्यात कैद झाली. हा व्हिडीओ सध्या सोशल मीडियावर प्रचंड व्हायरल होत आहे.

जिममध्ये व्यायाम करत असताना उत्तराखंड पोलिसात कार्यरत असलेल्या कॉन्स्टेबल आणि एसओजी जवानाचा मृत्यू झाला. जिममध्ये कोसळल्यानंतर उपस्थित असणाऱ्यांनी त्यांना तातडीने एका खासगी रुग्णालयात नेण्यात आले. पण डॉक्टरांनी त्यांना मृत घोषित केले. जिममध्ये व्यायाम करत असताना कोसळताना पोलिसाचा व्हिडीओ व्हायरल झालाय.

हार्टअटॅकने मृत्यू झालेल्या जवानाचे नाव गिरीश भट्ट असे आहे. ते मूळचे पिथोरगडचे असून सध्या भजनपूर गावात राहत होते. मागील तीन वर्षांपासून गिरीश जिममध्ये व्यायाम करत होते. पण शुक्रवारी दुपारी आक्रीत घडले. नेहमीप्रमाणे ते जिममध्ये आले होते. व्यायाम करायला सुरूवात केली होती. पण व्यायाम करत असताना त्याची प्रकृती अचानक खालावली आणि ते कोसळले.

पोलीस कोसळल्याचे पाहिल्यानंतर जिममध्ये उपस्थित असलेल्या इतरांनी त्याला उधम सिंग नगरमधील खातिमा येथील एका खासगी रुग्णालयात दाखल केले. पण डॉक्टरांनी उपचाराआधीच त्यांचा मृत्यू झाल्याचे सांगितले. डॉक्टरांच्या मते, हृदयविकाराच्या झटक्याने त्यांचा मृत्यू झाल्याचे मानले जात आहे. गिरीश भट्ट यांच्या निधनाच्या बातमीने त्यांच्या कुटुंबियांमध्ये मोठी शोककळा पसरली आहे. गिरीश भट्ट यांची पत्नी गृहिणी असून त्यांचे दोन मुलं शिक्षण घेत आहेत.