Kolkata Shocking News : कोलकाता पुन्हा हादरलं! प्रसिद्ध इन्स्टिट्यूटच्या बॉइज हॉस्टेलमध्ये विद्यार्थिनीवर अत्याचार; आधी बेशुद्ध केलं, नंतर...

कोलकातामधून धक्कादायक बातमी समोर आली आहे. कोलकात्यातील प्रसिद्ध इंडियन इन्स्टिट्यूट ऑफ मॅनेजमेंट (आयआयएम) येथे एका विद्यार्थिनीवर कॅम्पसमध्ये बलात्कार केल्याचा आरोप आहे. पोलिसांनी दिलेल्या माहितीनुसार, आरोपीने समुपदेशनाच्या नावाखाली मुलीला वसतिगृहात बोलावले आणि नंतर तिच्या जेवणात आणि पेयांमध्ये अमली पदार्थ मिसळून तिच्यावर बलात्कार केला.

मिळालेल्या माहितीनुसार, पीडितेने शुक्रवारी संध्याकाळी हरिदेवपूर पोलिस ठाण्यात तक्रार दाखल केली. तक्रारीत म्हटले आहे की, दुसऱ्या वर्षाच्या एका विद्यार्थ्याने तिला समुपदेशन सत्राच्या बहाण्याने मुलांच्या वसतिगृहात बोलावले. तिथे तिला पिझ्झा आणि सॉफ्ट ड्रिंक्स देण्यात आले, त्यानंतर ती बेशुद्ध पडली. जेव्हा मुलीला शुद्ध आली तेव्हा ती वसतिगृहात होती आणि तिच्यावर बलात्कार झाला असल्याचं तिने पोलीस तक्रारीत म्हटलं.

मुलीने असेही म्हटले आहे की, आरोपीने तिला धमकी दिली आणि म्हटले की जर तिने कोणाला सांगितले तर त्याचे परिणाम भयानक होतील.दरम्यान पोलिसांनी सांगितल्याप्रमाणे, आरोपीला ताब्यात घेतले असून पोलीस या घटनेचा अधिकचा तपास करत आहेत.

काही दिवसांपूर्वी अशीच एक घटना दक्षिण कोलकत्तामधील लॉ कॉलेज मध्ये घडली होती. लॉ कॉलेजमध्ये झालेल्या सामूहिक बलात्काराचा हा प्रकार २५ जून रोजी घडला. ज्यामध्ये ३० जून रोजी पोलिसांनी १२ तासांच्या आत तीन मुख्य आरोपींना अटक केली. आता त्या प्रकरणातील चारही आरोपी १४ दिवसांच्या न्यायालयीन कोठडीत आहेत.