सौदी अरबमध्ये हेलिकॉप्टर क्रॅश; भीषण अपघातात १४ जणांचा मृत्यू

सौदी अरेबियातील 'रास तानुरा' येथे सौदी अरामकोचे एक हेलिकॉप्टर कोसळले आहे. या दुर्दैवी अपघातात चौदा जणांचा मृत्यू झाला आहे. अपघाताचे कारण अद्याप समजू शकलेले नाही आणि त्याबाबत तपास सुरू आहे. जगातील आघाडीच्या तेल कंपन्यांपैकी एक असलेल्या 'सौदी अरामको'चे (Saudi Aramco) एक हेलिकॉप्टर 'रास तानुरा' (Ras Tanura) भागात कोसळले. सरकारी वृत्तसंस्थेने दिलेल्या माहितीनुसार, या अपघातात मृत पावलेले सर्वजण स्थानिक नागरिक होते.

हॉर्मुझच्या सामुद्रधुनीजवळ अपघात

हा भीषण अपघात सौदी अरेबियाच्या पूर्व किनारपट्टीवरील 'रास तानुरा' भागात झाला. हा भाग मोक्याच्या दृष्टीने महत्त्वाच्या असलेल्या हॉर्मुझच्या सामुद्रधुनीच्या पश्चिमेस स्थित आहेत. 'रास तानुरा' हे मध्य पूर्वेतील सर्वात मोठे तेल रिफायनरी केंद्र मानले जाते आणि त्याचे संचालन खुद्द 'सौदी अरामको'द्वारे केले जाते. अपघातग्रस्त हेलिकॉप्टरही याच कंपनीचे होते आणि ते नियमित कार्यवाही चालू असताना हा अपघात झाला.

अपघात का आणि कशामुळे झाला? तपास सुरू

हेलिकॉप्टर अपघात कशामुळे झाला आणि त्यामागचे कारण काय यांबाबतची नेमकी माहिती अद्याप समोर आलेली नाही. घटनेचे गांभीर्य लक्षात घेता, संबंधित विभाग आणि वरिष्ठ अधिकाऱ्यांच्या देखरेखीखाली या प्रकरणाची सविस्तर चौकशी सुरू करण्यात आली आहे.

सौदी अरामकोने आखातातील आपल्या 'रास तानुरा' टर्मिनलवर जवळपास चार महिन्यांनंतर कच्च्या तेलाच्या लोडिंगचे कामकाज पुन्हा सुरू केले होते, त्याच वेळी ही घटना घडली. जागतिक बाजारपेठेत तेल आणि वायूची निर्यात वाढवण्याचे प्रयत्न सुरू असतानाच या भीषण अपघातामुळे खळबळ उडाली आहे.