राजस्थानमधील काँग्रेसच्या राजकीय नाराजीनाट्यातून अशोक गेहलोत यांना क्लीन चीट? चर्चांना उधाण

शिवाजी काळे

Rajasthan Political crisis : काँग्रेस अध्यक्षपदाच्या निवडणुकीनंतर सुरू झालेल्या राजस्थानमधील नाट्यमय राजकीय घडामोडींकडे साऱ्यांचे लक्ष लागले आहे. काल, सोमवारी राजस्थानमधील नाराजीनाट्यावर काँग्रेसच्या (Congress) हंगामी अध्यक्ष सोनिया गांधी (Sonia Gandhi) नाराज झाल्या होत्या. राजस्थानमध्ये नाट्य करणाऱ्या आमदारांवर काँग्रेस पक्षाकडून कारवाई करणार असल्याची चर्चा आहे. तर याच नाराजीनाट्यावर राजस्थानचे प्रभारी अजय माकन यांनी काँग्रेस अध्यक्ष सोनिया गांधी यांना लिखित स्वरुपात रिपोर्ट सादर केला आहे. राजस्थानमधील राजकीय नाराजीनाट्यात अशोक गेहलोत यांना क्लीन चीट मिळाल्याची चर्चा राजकीय वर्तुळात सुरू झाली आहे. (Rajastan Political News In Marathi )

राजस्थानमधील नाराजीनाट्यावर काँग्रेसच्या हंगामी अध्यक्ष सोनिया गांधी नाराज झाल्या होत्या. काँग्रेसने अशोक गेहलोत (Ashok Gahlot) यांचे निकटवर्तीय शांती धारीवाल ,महेश जोशी आणि धर्मेंद्र राठौर यांना कारणे दाखवा नोटीस बजावली आहे. शांती धारीवाल यांनी पक्षाने बोलावलेल्या बैठकीच्या व्यतिरिक्त बैठक बोलावली होती. तसेच या बैठकीतील आमदारांच्या जेवणाची सोय मुख्यमंत्री अशोक गेहलोत यांनी केल्याची चर्चा आहे. राजस्थानमधील आमदारांच्या बंडामागे मुख्यमंत्री अशोक गेहलोत असल्याचीही चर्चा आहे. याच घटनेनंतर राजस्थानमधील (Rajsthan) राजकीय घडामोडींना वेग आला आहे.

दरम्यान, सदर पार्श्वभूमीवर राजस्थानचे प्रभारी अजय माकन यांनी आज, मंगळवारी काँग्रेस अध्यक्ष सोनिया गांधी यांना लिखित स्वरुपात रिपोर्ट सादर केला. तर राजस्थानमधील राजकीय नाराजीनाट्यात अशोक गेहलोत यांना क्लीन चीट मिळाल्याची चर्चेला उधाण आलं आहे. दरम्यान, सोमवारी अजय माकन आणि मल्लिकार्जुन खर्गे यांनी राजस्थानमधील राजकीय परिस्थितीच्या पार्श्वभूमीवर सोनिया गांधी यांची १० जनपथवर भेट घेतली. त्यामुळे राजस्थानचा मुख्यमंत्री बदलला जाणार का ? याकडे सर्वांचे लक्ष लागले आहे.