Attack On Congress Headquarter: राहुल गांधींच्या विधानानंतर वाद विकोपाला; काँग्रेस मुख्यालयावर हल्ला

खासदार राहुल गांधींच्या विधानानंतर पश्चिम बंगालमध्ये राजकीय वातावरण तापलंय. राहुल गांधींनी पंतप्रधान मोदींवर अपमानास्पद टिप्पणी केल्यानंतर काँग्रेस कमेटीच्या मुख्यालयावर हल्ला झालाय. या हल्ल्याप्रकरणी तीन जणांना अटक करण्यात आलीय. एका वरिष्ठ पोलिस अधिकाऱ्याने याबाबत माहिती देताना सांगितले की, या हल्ल्याप्रकरणी मुख्य आरोपी संतोष राजवा आणि त्याचे दोन साथीदारांना अटक करण्यात आलीय.

या तिघांवर राहुल गांधींचे फोटोला काळं फासणं, पक्षाचे फलक फाडण्याचा प्रयत्न आणि परिसरात उपस्थित असलेल्या लोकांना धमकावण्याचा आरोप करण्यात आलाय. या तिन्ही आरोपींनी आपल्या साथीदारांसह सीआयटी रोडवरील काँग्रेस कार्यालयाबाहेर टायर जाळलेत. तसेच कार्यालयात जबरदस्तीनं घुसण्याचा प्रयत्न केल्याचा आरोप या तिघांवर आहे.

पोलिसांनी दिलेल्या माहितीनुसार, या हल्ल्यातील मुख्य आरोपी स्थानिक भारतीय जनता पक्षाचा नेता राकेश सिंह असून तो फरार झालाय. पोलिसांकडून राकेश सिंह आणि इतर आरोपींचा शोध घेतला जात आहे. वरिष्ठ पोलीस अधिकारी म्हणाले की, आम्ही लवकरच इतर आरोपींना पकडू. या हल्ल्याचे नेतृत्व राकेश सिंह यांनी केले होते. राकेश सिंह यांनी काही दिवसापूर्वी काँग्रेस सोडून भाजपमध्ये प्रवेश केला होता. राहुल गांधी यांनी बिहारमधील 'मतदार अधिकार यात्रे' दरम्यान पंतप्रधानांविरुद्ध वक्तव्य केलं होतं. त्याचा निषेध राकेश सिंह यांनी केला होता.

बिहारमध्ये विधानसभा निवडणुका होणार आहेत, त्यापूर्वी राहुल गांधींनी मतचोरीवरून भाजप आणि निवडणूक आयोगावर गंभीर आरोप केलाय. भाजप मतांची चोरी करून सत्तेत असल्याचा आरोप राहुल गांधींनी केलाय. त्यावरून देशातील राजकारणात मोठी खळबळ माजली असून आरोप प्रत्यारोप केले जात आहे.