मैत्री- व्यापार ते युक्रेन वॉर; अनेक करारांवर चर्चा, पीएम मोदी आणि पुतीन यांच्या बैठकीत नेमकं काय झालं?

रशियाचे राष्ट्राध्यक्ष व्लादिमीर पुतिन हे तब्बल ४ वर्षांनंतर भारत दौऱ्यावर आले. दिल्लीत त्यांचं भव्य स्वागत करण्यात आलं. या भेटीला विशेष महत्त्व प्राप्त झाले आहे. या भेटीनंतर नरेंद्र मोदी यांनी सांगितले की, भारत रशिया संबंधाचा पुढील प्रवास अधिक मजबूत होईल. दोन्ही देशांनी परस्पर व्यापार वाढवण्याचा निर्धार केला आहे. लवकरच २०३० पर्यंतचा व्यापार आराखडा तयार करण्यात आला आहे, असं त्यांनी सांगितलं.

पंतप्रधान नरेंद्र मोदी म्हणाले की, 'युक्रेन मुद्द्यावर भारत आणि रशियामध्ये चर्चा झाली आहे. भारत कोणत्याही एका देशाच्या बाजूने नसून, शांतीचा समर्थक आहे. दोन्ही देशांमध्ये शांतता प्रस्थापित व्हावी, ही भारताची भूमिका असल्याचं त्यांनी स्पष्ट केलं'. 'आतंकवाद हा मानवतेसाठी सर्वात मोठा धोका असून, या लढ्यात भारत आणि रशिया दोन्ही देश एकमेकांना पाठिंबा देतील', असं त्यांनी सांगितलं.

पंतप्रधान नरेंद्र मोदी नेमकं काय म्हणाले?

व्लादिमीर पुतिन यांच्या भेटीनंतर पत्रकार परिषद घेण्यात आली. यावेळी पंतप्रधान नरेंद्र मोदी यांनी भारत रशिया संबंधांना नवीन उंचीवर नेण्याबद्दल सांगितले. तसेच त्यांनी अनेक प्रमुख मुद्द्यांवर विस्तृतपणे भाष्य केले. यांसह अनेक प्रमुख घोषणाही केल्या. पंतप्रधान नरेंद्र मोदी म्हणाले की, 'भारत - रशिया संबंध नेहमीच ऊर्जा आणि सुरक्षेच्या बाबतीत महत्त्वाचे राहिले आहेत. यापुढेही मजबूत राहतील', असं पंतप्रधान मोदी म्हणाले. यावेळी त्यांनी 'दोन्ही देशांचे संबंध संस्कृतीत खोलवर रूजलेले आहेत', असं सांगितलं.

'आता भारतात २ नवीन रशियन काउंसलेट उघडल्याने लोकांमधील संपर्क आणि देवाणघेवाण आणखी वाढेल', असंही मोदींनी स्पष्ट केलं. यावेळी पर्यटनाच्या दिशेनं एक मोठे पाऊल उचलत पंतप्रधान नरेंद्र मोदींनी मोठी घोषणा केली आहे. 'रशियन नागरिकांसाठी लवकरच ३० दिवसांचा मोफत व्हिसा सुरू केला जाईल. यामुळे पर्यटन, शिक्षण आणि व्यावसायिक संबंधांना नवीन चालना मिळेल', असं नरेंद्र मोदींनी स्पष्ट केलं.

'हा व्हिसा ग्रुपसाठी देखील उपलब्ध आहे. दरम्यान, मॅनपॉवर मोबिलिटी अॅग्रीमेंटमुळे दोन्ही देशांमधील कार्यबल सहकार्य आणखी मजबूत होईल', असा विश्वासही यावेळी मोदींनी व्यक्त केला.

भारत आणि रशियात महत्त्वाचे करार

दरम्यान, भारत आणि रशियात महत्त्वाचे करार करण्यात आले आहेत. 'आरोग्य, शिक्षण, खतं, रसायनं यांसह, शिपिंग आणि ट्रान्सपोर्टसंदर्भात करार करण्यात आले', अशी माहिती समोर आली आहे. सागरी क्षेत्रासंदर्भातही दोन्ही देशामध्ये महत्त्वाचे करार झालेत..

दोन्ही देशातील संबंध दृढ केल्याबद्दल रशियाचे राष्ट्राध्यक्ष व्लादिमिर पुतीन यांचे मोदींनी आभार मानलेत.