Hospital Fire : रुग्णलयात अग्नितांडव! १५ नवजात बाळांचा मृत्यू; परिसरात शोककळा

महाराष्ट्रातील अमरावतीत काही दिवसांपूर्वी स्त्री रुग्णालयात व्हेंटिलेटरचा स्फोट होऊन ३ नवजात बाळांचा मृत्यू झाला. अशातच आता पाकिस्तनमधून हृदयद्रावक घटना समोर आली आहे. पाकिस्तानची राजधानी इस्लामाबाद येथे बुधवारी सकाळी रुग्णालयाच्या स्त्रीरोग विभागात भीषण आग लागल्याची धक्कादायक घटना घडली. या दुर्घटनेत तब्बल १५ नवजात बालकांचा मृत्यू झाल्याची माहिती समोर आली आहे. ही घटना पाकिस्तान इन्स्टिट्यूट ऑफ मेडिकल सायन्सेस (PIMS) रुग्णालयात घडली.

स्थानिक माध्यमांच्या माहितीनुसार, आग लागली तेव्हा रुग्णालयातील नवजात बालकांच्या कक्षात एकूण १६ बाळे होती. आग आणि धुरामुळे परिस्थिती अत्यंत गंभीर बनली. बचाव पथकांनी तातडीने घटनास्थळी धाव घेतली. मात्र, या दुर्घटनेत केवळ एका नवजात बालकाला सुरक्षितपणे बाहेर काढण्यात यश आले, तर १५ बालकांचा दुर्दैवी मृत्यू झाला.

प्राथमिक माहितीनुसार, नवजात बालकांच्या कक्षातील एअर कंडिशनरच्या कॉम्प्रेसरचा स्फोट झाल्यानंतर आग लागल्याचा अंदाज व्यक्त करण्यात आला आहे. स्फोटानंतर काही क्षणांतच आगीने परिसराला वेढल्याचे सांगण्यात येत आहे. त्यामुळे रुग्णालयातील कर्मचाऱ्यांमध्ये आणि रुग्णांच्या नातेवाईकांमध्ये मोठी धावपळ उडाली. सकाळी साधारण ७ वाजण्याच्या सुमारास स्त्रीरोग विभागात आग लागली. घटनेची माहिती मिळताच बचाव पथके आणि अग्निशमन दलाचे जवान रुग्णालयात दाखल झाले.

आग नियंत्रणात आणण्यासोबतच विभागातील रुग्ण आणि कर्मचाऱ्यांना सुरक्षित ठिकाणी हलवण्याचे काम करण्यात आले. आग विझवल्यानंतर परिसरात कुलिंग ऑपरेशनही करण्यात आले. या दुर्घटनेनंतर रुग्णालयातील नवजात बालकांच्या आणि प्रसूती विभागातील सुरक्षा व्यवस्थेवर गंभीर प्रश्न उपस्थित झाले आहेत. रुग्णालयातील एअर कंडिशनिंग यंत्रणा, विद्युत व्यवस्था आणि अग्निसुरक्षा उपाययोजनांची योग्य देखभाल होत होती का, याबाबत आता चौकशीची मागणी होत आहे. या भीषण दुर्घटनेमुळे मृत नवजात बालकांच्या कुटुंबीयांवर दुःखाचा डोंगर कोसळला आहे.