Pakistan Blast: पाकिस्तानमध्ये मोठा दहशतवादी हल्ला, सैनिकांच्या मुख्यालयाजवळ २ बॉम्बस्फोट अन् गोळीबार; पाहा VIDEO

Summary -

• पाकिस्तान बॉम्बस्फोटाने हादरले

• पाकिस्तानच्या पेशावरमधील एफसी मुख्यालयाजवळ दोन स्फोट आणि गोळीबार

• एका आत्मघातकी हल्लेखोराने स्वतःला उडवून दिल्यानंतर चकमक सुरू

• सुरक्षा दलांनी दोन दहशतवाद्यांना ठार केले

पाकिस्तानवर मोठा दहशतवादी हल्ला झाला आहे. पाकिस्तानातील पेशावरमध्ये सोमवारी सकाळी दोन स्फोट आणि गोळीबाराची घटना घडली. पेशावरमधील फेडरल कॉन्स्टेब्युलरी (एफसी) मुख्यालयावर हल्ला करण्यात आला. याठिकाणी २ स्फोट आणि गोळीबार करण्यात आला आहे. पेशावरचे कॅपिटल सिटी पोलिस अधिकारी डॉ. मियां सईद अहमद यांनी हल्ल्याची माहिती दिली.

या दहशतवादी हल्ल्यानंतर पेशावरमधील सैन्यांच्या मुख्यालयाजवळ सुरक्षाव्यवस्थेत वाढ करण्यात आली असून सुरक्षा दल आणि हल्लेखोरांमध्ये चकमक सुरू आहे. अधूनमधून गोळीबार सुरू आहे. याठिकाणी दोन स्फोट घडवून आणण्यात आले. दहशतवाद्यांनी मुख्यालयाला लक्ष्य करून गोळीबार केला. सुरक्षा दलांने दहशतवाद्यांना चोख प्रत्युत्तर दिले. परिस्थिती नियंत्रणात आणण्यासाठी संपूर्ण परिसराला घेराव घालत सर्च ऑपरेश सुरू करण्यात आले आहे.

डॉनच्या वृत्तानुसार, हल्ल्यानंतर पेशावरमधील घटनास्थळाला पूर्णपणे वेढा घालण्यात आला आहे. सार्वजनिक आणि वाहनांच्या हालचालींवर बंदी घालण्यात आली आहे. पोलिस आणि रॅपिड रिअ‍ॅक्शन फोर्सचे पथक परिसरात सर्च ऑपरेशन करत आहेत. अशी देखील माहिती समोर आली आहे की, एका आत्मघातकी हल्लेखोराने एफसी मुख्यालयाच्या गेटवर स्वतःला उडवून दिले. स्फोटानंतर गोळीबार देखील करण्यात आला. या स्फोट आणि गोळीबारानंतर सुरक्षा दलाने दोन दहशतवाद्यांचा खात्मा केला. सुरक्षा दलांनी परिसराला वेढा घातला आहे.

या दहशतवादी हल्ल्यात किती जणांचा मृत्यू आणि किती जण जखमी झाले आहेत याची माहिती समोर आली नाही. या स्फोटाचे फोटो आणि व्हिडीओ समोर आले असून ते व्हायरल होत आहेत. खैबर पख्तूनख्वा आणि बलुचिस्तान हे दहशतवादाचे केंद्र आहेत. या दोन्ही प्रांत वारंवार दहशतवादी हल्ले होत असतात. या दहशतवादी हल्ल्याची जबाबदारी अद्याप कोणत्याही दहशतवादी संघटनेने घेतली नाही. सध्या या हल्ल्याचा तपास केला जात आहे.