Nigeria Attack: भयंकर! नायजेरियाच्या सैन्य दलावर आत्मघातकी हल्ला, भीषण स्फोटात २७ जवानांचा मृत्यू

Nigeria Attack: नायजेरियाच्या उत्तर पूर्व भागात आत्मघातकी हल्ला झाल्याची भीषण घटना घडली आहे. नायजेरियाच्या घटनेत कमीत कमी २७ जवानांचा मृत्यू झाल्याची घटना घडली आहे. वृत्त संस्था एएफपीच्या माहितीनुसार, नायजेरियाच्या सैनिकांनी बर्नो आणि योबे राज्यादरम्यान असणाऱ्या दहशतवाद्यांच्या अड्ड्यावर आक्रमण केलं होतं. त्यानंतर त्यांच्यावर आत्मघातकी हल्ला झाल्याची माहिती मिळत आहे.

एका सैन्य दलातील अधिकाऱ्यांनी एएफपी वृत्त संस्थेला सांगितलं की, 'आत्मघातकी हल्ल्यात २७ सैनिक मारले गेले. यात काही कमांडर देखील होते. काही इतर लोक देखील या घटनेत जखमी झाले आहेत. मागील काही वर्षातील सर्वात मोठा आत्मघातकी हल्ला असल्याचं बोललं जात आहे.

दुसऱ्या एका अधिकाऱ्याने सांगितलं की, 'आत्मघातकी हल्ला केला, त्यावेळी चारही बाजूला अंधार होता. यामुळे चारही बाजूंना सैनिकांना स्पष्ट दिसत नव्हतं. या हल्ल्यातील जखमींचा आकडा वाढण्याची शक्यता आहे. या हल्ल्यातील काही जणांची प्रकृती गंभीर आहे'.

आत्मघातकी हल्लेखोराने स्फोटकांनी भरलेलं वाहन झाडाझुडपात लपवून ठेवलं होतं. याच वाहनाला एका सैनिकाच्या वाहनाने धडक दिली. त्यानंतर हा भीषण स्फोट झाल्याची माहिती मिळत आहे. 'तिंबकटू त्रिकोण' या भागात भीषण हल्ला झाला आहे. या आधी हा विभाग बोको हराम या संघटनेच्या ताब्यात होता.

ISWAP या संघटनेने 2016 साली बोको हराम या संघटनेतून फुटून उत्तर-पूर्व भागात दहशतवादी संघटना तयार केली. या संघटनेने आता बोको हरामच्या अड्ड्यावर कब्जा करणे सुरु केले आहे. यामध्ये तिंबकटू त्रिकोण आणि सांबिसा जंगलाचा समावेश आहे. ही संघटना रस्त्याच्या किनाऱ्यावरील खाणीत सुरुंग लावणे किंवा वाहनांमध्ये स्फोटके ठेवून सैनिकांना टार्गेट करते. जुलै महिन्यात सात सैनिक मारले गेले होते. त्यांच्या वाहनाने खाणीला धडक दिली होती.