ONGC गॅस गळती; अनेक ठिकाणी लागली आग, दूर दूरपर्यंत पसरल्या ज्वाळा; गावं करण्यात आली खाली|Video Viral

आंध्र प्रदेशातील आंबेडकर कोनसीमा जिल्ह्यात ONGC गॅस गळती होत असून अनेक ठिकाणी आग लागल्याची घटना घडलीय. जिल्ह्यातील राजोलू टाउनच्या इरुसुमांडा आणि मलिकीपुरम विभागात ओएनजीसी गॅस गळतीमुळे भीती पसरली आहे. गॅस गळती झाल्यानं अनेक ठिकाणी आगीचा भडका उडालाय. आगीच्या ज्वाळा दूर दूरपर्यंत दिसत आहेत.

दरम्यान आग नियंत्रणात आणण्यासाठी प्रयत्न सुरू आहेत. जवळपासच्या रहिवाशांनी ओएनजीसी अधिकाऱ्यांना गॅस गळतीची माहिती दिली आहे. परिस्थिती नियंत्रणात आणण्यासाठी प्रशासकीय कर्मचारी ओएनजीसी टीमसोबत काम करत आहेत. आग भडकल्यानंतर आसपासच्या गावं खाली करण्यात आली आहेत. तेथील लोकांना दुसऱ्या ठिकाणी हलवण्यात आले आहे.

मल्कीपुरम विभागातील इरुसुमांडा गावात गॅस गळतीची घटना घडली आहे. स्थानिकांनी या घटनेची माहिती ओएनजीसी अधिकाऱ्यांना दिली आहे. ओएनजीसीचे अधिकारी, अग्निशमन दल आणि पोलिस कर्मचारी आग शमविण्याचे काम करत आहेत. दरम्यान आगीच्या घटना घडल्यानं गावकरी घाबरले आहेत. जवळच्या तीन गावांचा गॅस आणि वीजपुरवठाही खंडित झाला आहे. परिस्थितीचा आढावा घेण्यासाठी ओएनजीसीचे पथक घटनास्थळी दाखल झाले आहे. गळती रोखण्यासाठी प्रयत्न सुरू असल्याची माहिती अग्निशमन विभागाचे अधिकारी बालकृष्ण यांनी दिलीय.

ओएनजीसीच्या पाइपलाइनमधून मोठ्या प्रमाणात गॅस गळती झालीय. त्यानंतर स्फोट झाल्यानंतर संपूर्ण परिसरात भीती पसरलीय. मिळालेल्या माहितीनुसार, या दुर्घटनेच्या वेळी ओएनजीसीच्या विहिरीत तांत्रिक दुरुस्तीचे काम सुरू होतं. त्याचदरम्यान गॅस गळती होऊ लागली. सुदैवाने या दुर्घटनेत कोणतीच जीवितहानी झाली नाहीये.