Nigeria Flood : पुराचा हाहाकार, धरण फुटलं, ११७ जणांचा मृत्यू, बघा धक्कादायक VIDEO

Nigeria Flood  : नायजेरियामध्ये पुराने हाहाकार माजवला आहे. या पुरामुळे लोकांच्या घरात पाणी घुसलं आहे. पुरामुळे शहरात चोहीकडे पाणीच पाणी झालं आहे. पुराच्या हाहाकारात आतापर्यंत ११७ जणांचा मृत्यू झाल्याची माहिती मिळत आहे. या मृतांचा आकडा आणखी वाढण्याची शक्यता व्यक्त करण्यात आली आहे.

मीडिया रिपोर्टनुसार, सेंट्रल नायजेरियाच्या नायजर राज्यामध्ये पुराचा कहर पाहायला मिळत आहे. मुसळधार पावसानंतर पुराने कहर केला आहे. त्यात धरण फुटल्याने परिस्थिती बिकट झाली आहे. या पुरात ११७ जणांचा मृत्यू झाला असून मृतांचा आकडा वाढण्याची शक्यता व्यक्त करण्यात आली आहे.

नायजेरियाचे हुसैनी ईसा यांनी सांगितलं की, अधिकाऱ्यांच्या माहितीनुसार ११७ लोकांचा मृत्यू झाल्याची माहिती मिळत आहे. तर आतापर्यंत ८८ जणांचे मृतदेह ताब्यात घेण्यात आले आहेत. या पुरात अनेक जण बेपत्ता झाले आहेत. पुरामुळे नायजरमधील जनजीवन विस्कळीत झालं आहे.

नायजेरियाला तीन वर्षांपूर्वी अशाच भयंकर पुराचा सामना करावा लागला होता. नायजेरियात दरवर्षीत मुसळधार पावसामुळे नद्या दुधडी भरून वाहतात. यामुळे आजूबाजूच्या गावांना धोका निर्माण होतो.

दरम्यान, तीन वर्षांपूर्वी झालेल्या पुरामुळे ६०० हून अधिक लोकांचा मृत्यू झाला होता. लाखो लोकांना या पुराचा फटका बसला होता. अनेक देशांनी पुराचा इशारा दिल्यानंतरही नायजेरिया देशाने कोणतीही पूर्वतयारी केली नव्हती. मागील दशकात नायजेरियाला पुरामुळे १३ लाखांहून अधिक जणांना फटका बसला आहे. साधारण नायजेरियाला दरवर्षीच पुराचा फटका बसत असल्याचे दिसत आहे.

नायजेरियातील पुरामागे मुसळधार पाऊस आणि हवामान बदलाचंही कारण असल्याचं म्हटलं जात आहे. तीन वर्षांपूर्वी वर्षी ढिसाळ नियोजन आणि पायाभूत सुविधांच्या कमतरतेमुळे नुकसान वाढलं होतं. शेतीचंही मोठे नुकसान झालं होतं. नायजेरियात तीन वर्षापूर्वीच्या पुरामुळे ३६ पैकी २७ राज्यांना पुराचा फटका बसला होता.