बड्या पोलीस अधिकाऱ्याचा अपघाती मृत्यू; भरधाव दुचाकी महामार्गावर उभ्या कंटेनरमध्ये घुसली, वाहनांचा चक्काचूर

उत्तर प्रदेशच्या मुरादाबादमधून एक धक्कादायक घटना समोर आली आहे. कटघर पोलीस स्टेशनच्या हद्दीत असलेल्या दिल्ली-लखनौ राष्ट्रीय महामार्गावर शुक्रवारी रात्री भीषण अपघात घडला. या अपघातात राष्ट्रीय तपास संस्थेचे उपअधीक्षकांचा मृत्यू झाला. त्यांच्यासोबत असलेली महिला देखील जखमी झाली. भरधाव वेगात असलेल्या दुचाकीने कंटेनरला धडक दिल्याने अपघात घडल्याचे सांगण्यात आलं आहे.

पोलिसांनी दिलेल्या माहितीनुसार, मोहालीत राहणारे राष्ट्रीय तपास संस्थेचे ३२ वर्षीय उपअधीक्षक ईशान मेहरा हे मैत्रीण पूनम यांच्यासोबत दुचाकीने दिल्लीहून बाजपूरला निघाले होते. दोघे दुचाकीवरून जवळपास रात्री साडे अकराच्या सुमारास कटघर पोलीस स्टेशनच्या देवापूर गावातून जात होते. त्यावेळी दुचाकी थेट महामार्गावर उभ्या असलेल्या कंटेनरला धडकली. या अपघातात दुचाकीवरील दोघे गंभीर जखमी झाले. अपघाताची माहिती मिळताच पोलीस घटनास्थळी पोहोचले. पोलिसांनी दोघांना रुग्णालयात दाखल केले.

रुग्णालयात दाखल केल्यानंतर डॉक्टरने ईशान मेहरा यांना मृत घोषित केले. तर पूनम यांच्यावर उपचार सुरू आहेत. पोलीस अधीक्षक कुमार रणविजय सिंह यांनी सांगितलं की, ईशान मेहरा हे दिल्ली एनआयए ऑफिसमध्ये उपअधीक्षक पदावर कार्यरत होते. पोस्टमार्टम केल्यानंतर मृतदेह त्यांच्या नातेवाईकांना दिला जाईल. पोलिसांनी अपघातामागील कारण शोधण्यास सुरुवात केली आहे.

तत्पूर्वी, गंगा महामार्गावर महिनाभरात १५ अपघात झाले. मेरठ ते प्रयागराजपर्यंत ५९४ किलोमीटर अंतराचा गंगा महामार्ग २९ मे रोजी सुरू झाला. या महामार्गावर ३० दिवसांत जवळपास १५ अपघात झाले आहेत. या अपघातात एकूण ६ लोकांचा मृत्यू झाला आहे. तर २५ हून अधिक जण गंभीर जखमी झाले आहेत.