Accident News : देवदर्शनाहून परतताना काळाचा घाला, यात्रेकरूंची बस दरीत कोसळून भीषण अपघात; ७ जणांचा मृत्यू

Nepal Gorakha Bus Accident 7 Devotes Dies नेपाळच्या गोरखा जिल्ह्यात भारतीय यात्रेकरूंची बस दरीत कोसळून भीषण अपघात झाला आहे. या अपघातात ७ जणांचा जागीच मृत्यू झाला असून बसमधील इतर ७ जण गंभीर जखमी झाले आहेत. जखमींना जवळच्या रुग्णालयात दाखल करण्यात आले आहे. तसेच पोलीस या प्रकरणाचा तपास करत आहेत. या दुर्घटनेत मृत झालेल्या भाविकांच्या कुटुंबियांवर दुःखाचा डोंगर कोसळला आहे.

मिळालेल्या माहितीनुसार, शनिवारी सायंकाळच्या सुमारास भारतीय यात्रेकरूंची मायक्रोबस मनकामना मंदिरापासून पश्चिमेकडे तनाहूं जिल्ह्यातील अंबुखैरेनी भागाकडे जात होती. यादरम्यान चालकाचे बसवरील नियंत्रण सुटल्याने एका वळणावर यात्रेकरूंची बस दरीत कोसळली.

या दुर्घटनेत बसमधील ७ जणांचा जागीच मृत्यू झाला. तर ७ जण गंभीर जखमी झाले. गोरखा मुख्य जिल्हा अधिकारी तुलसी बहादूर श्रेष्ठ यांनी सांगितले की, जखमींना उपचारासाठी भरतपूर (चितवन जिल्हा) येथील चितवन वैद्यकीय महाविद्यालयात पाठवण्यात आले असून बचावकार्य अजूनही सुरू असल्याचे त्यांनी सांगितले.

दरम्यान ७ यात्रेकरूंच्या दुर्दैवी मृत्यूने त्यांच्या कुटुंबियांवर दुःखाचा डोंगर कोसळला आहे. नेपाळमध्ये अलिकडच्या काळात रस्ते अपघातांमध्ये लक्षणीय वाढ झाली आहे. नेपाळ वाहतूक पोलिसांच्या आकडेवारीनुसार, २०२४ ते २५ या काळात ही संख्या ७,६६९ झाली आहे.