Neet ची तयारी करणाऱ्या विद्यार्थ्याचा टोकाचा निर्णय, स्वत:वर गोळी झाडत आयुष्य संपवलं

NEET परीक्षेची तयारी करणाऱ्या एका तरुणाने स्वत:वर गोळी झाडून आत्महत्या केली. घटनेच्या वेळी तो त्याच्या खोलीत होता. कुटुंबातील सदस्यांना खोलीतून गोळी चालवल्याचा आवाज आला. ते धावत तरुणाच्या खोलीत शिरले. तरुणाचे कुटुंबीय खोलीत पोहोचायच्याआधीच त्याचा मृत्यू झाला. ही घटना छत्तीसगडच्या बिलासपूरमधील सरकंडा पोलीस ठाण्याच्या हद्दीत घडली आहे.

मिळालेल्या माहितीनुसार, स्वत:वर गोळी झाडून आत्महत्या करणाऱ्या तरुणाचे नाव संस्कार सिंग असे आहे. संस्कार मागील काही काळापासून मानसिक ताण आणि नैराश्याने ग्रस्त होता. तो नीटची तयारी करण्यात व्यग्र होता असे त्याच्या कुटुंबियांनी पोलिसांना सांगितले. मानसिक ताण आणि परीक्षेची चिंता यामुळे संस्कारने आत्महत्या केल्याचा अंदाज पोलिसांनी वर्तवला आहे.

घटनेची माहिती मिळताच सरकंडा पोलीस घटनास्थळी दाखल झाले. कुटुंबियांची चौकशी करत त्यांनी तपास सुरु केली. तपासादरम्यान, संस्कारच्या खोलीतून फॉरेन्सिक आणि आवश्यक पुरावे गोळा करण्यात आले. त्यानंतर पोलिसांनी त्याचा मृतदेह शवविच्छेदन तपासणीसाठी पाठवला. शवविच्छेदन अहवालानंतर आत्महत्येचे कारण स्पष्ट होईल असे पोलिसांनी म्हटले आहे.

तरुणाने आत्महत्या केल्याने परिसरात मोठी खळबळ उडाली. संस्कार हा एक हुशार आणि मेहनती विद्यार्थी होता. पण अलिकडच्या काही महिन्यात तो मानसिकदृष्ट्या अस्वस्थ दिसत होता, असे त्याच्या शेजारच्यांनी आणि मित्रांनी सांगितले. परीक्षेचा दबावाचा मानसिक आरोग्यावर परिणाम झाल्याने त्याने हा टोकाचा निर्णय घेतला अशी शक्यता वर्तवली जात आहे.