BNP Leader: ३५ हजारांचं कर्ज फेडलं नाही; महिलेला आधी विवस्त्र केलं, नंतर बलात्कार, नेत्याचं महिलेसोबत भयंकर कृत्य

फक्त ३५ हजार रूपयांचे कर्ज फेडता न आल्यामुळे पीडित महिलेसोबत एका स्थानिक नेत्याने लैंगिक अत्याचार केला आहे. आधी विवस्त्र केलं. नंतर तिच्यावर बलात्कार केला. ही संतापजनक घटना बांगलादेशातील कोमिला जिल्ह्यातून उघडकीस येत आहे. या घटनेचा व्हिडिओ सोशल मीडियात व्हायरल झाला असून, संतप्त स्थानिकांनी या घटनेचा निषेध व्यक्त केला आहे. या प्रकरणाची माहिती पोलिसांना मिळताच त्यांनी ५ जणांना बेड्या ठोकल्या आहेत.

फजहर अली असे आरोपीचे नाव आहे. आरोपी बीएनपी म्हणजेच बांगलादेश नॅशनलिस्ट पार्टीशी संबंधित असून, स्थानिक नेता असल्याची माहिती आहे. पीडित महिलेने संबंधित व्यक्तीकडून कर्ज घेतले होते. पैसे फेडण्याची तारीख निघून गेली होती. मात्र, पीडित महिलेकडे पैसे नसल्यामुळे ती वेळेत कर्जाची रक्कम फेडू शकली नाही.

पैसे न मिळाल्याने संतप्त झालेला फजहर रात्री ११ वाजताच्या सुमारास पीडितेच्या घराबाहेर गेला. त्यावेळेस तिच्या घरातील सदस्य बाहेर गेले होते. आरोपीने दरवाजा ठोठावला. पीडितेने दरवाजा उघडण्यास नकार दिला. आरोपी संतापला. त्याने दरवाजा तोडून घरात प्रवेश केला. घरात प्रवेश करताच त्याने आधी महिलेचे कपडे फाडले. त्यानंतर महिलेवर अत्याचार केला. तिने बचावासाठी आरडाओरड केली. आवाज एकून परिसरातील लोकांनी घरात धाव घेतली.

घटनास्थळी पोहोचताच त्यांना महिला आणि आरोपी आक्षेपार्ह स्थितीत दिसले. यादरम्यान, कुणीतरी मोबाईल काढून व्हिडिओ शूट केला. तसेच व्हायरल केला. यानंतर काहींनी मिळून फजल अलीला बेदम मारहाण केली. पण लोकांच्या तावडीतून तो कसातरी निसटला आणि फरार झाला.

पोलिसांना याची माहिती मिळताच त्यांनी घटनास्थळी धाव घेत आरोपीविरोधात गुन्हा नोंदवला. स्थानिकांनी पोलिसांना सांगितले की, 'फजहर अली ड्रग्ज आणि जुगाराचा व्यवसाय करीत होता. तो स्वत:ला खालिदा झिया यांच्या नेतृत्वाखाली बीएनपीचा सदस्य म्हणवू घेतोय, पण त्याच्याकडे अधिकृत कोणतेही पद नव्हते'. दरम्यान, या प्रकरणी पोलिसांनी मुख्य आरोपीचा शोध घेऊन त्याला अटक केली असून, या घटनेशी संबंधित ४ तरूणांना बेड्या ठोकल्या आहेत. पोलिसांकडून चौकशी सुरू आहे.