बाहुबली फेम प्रसिद्ध कलाकाराचं निधन; मुलगा ऑस्कर विजेता, सिनेसृष्टी शोकसागरात बुडाली | Bahubali

चित्रपटसृष्टीतून एक हृदयद्रावक बातमी समोर येत आहे. प्रसिद्ध गीतकार, पटकथालेखक आणि निर्माता शिव शक्तिदत्ता यांचं वयाच्या ९२व्या वर्षी निधन झालं आहे. त्यांनी सोमवारी हैदराबादमधील मणिकोंडा येथील निवासस्थानी अखेरचा श्वास घेतला. वयोमानामुळे त्यांची प्रकृती काही काळापासून खालावली होती. शिव शक्तिदत्ता यांच्या निधनामुळे मनोरंजन विश्वात शोककळा पसरली आहे.

शिव शक्तिदत्ता हे केवळ गीतकारच नव्हते, पटकथा लेखक, दिग्दर्शक आणि निर्माता देखील होते. त्यांनी अनेक तेलुगू चित्रपटांसाठी काम केलं आहे. विशेष म्हणजे त्यांनी प्रभासच्या ब्लॉकबस्टर चित्रपट बाहुबली चित्रपटातील शीर्षक गीत लिहिले होते. त्यांच्या निधनाच्या बातमीने संपूर्ण इंडस्ट्री शोकसागरात बुडाली आहे.

शिव शक्तिदत्ता यांच्या लिखाणाची वेगळीच शैली होती. शिव शक्तिदत्ता हे सुप्रसिद्ध संगीतकार आणि ऑस्कर पुरस्कार विजेते एम.एम. कीरवाणी यांचे वडील होते. त्यांनी आरआरआरमधील प्रसिद्ध नाटू नाटू या गाण्यासाठी संगीत दिलं. त्यांच्या निधनामुळे दक्षिण भारतीय चित्रपटसृष्टीसह हिंदी चित्रपटसृष्टीतही शोककळा पसरली आहे.

पवन कल्याण आणि चिरंजीवी यांनी दु:ख केलं व्यक्त

शिव शक्तिदत्ता यांच्या निधनानंतर, अभिनेते, नेते आणि आंध्र प्रदेशचे उपमुख्यमंत्री पवन कल्याण यांनी सोशल मीडियावर श्रद्धांजली वाहिली आहे. तसेच मेगास्टार चिरंजीवी यांनीही तेलुगू भाषेत शिव शक्तिदत्ता यांना श्रद्धांजली वाहिली आहे. तसेच चाहत्यांनी देखील सोशल मीडियाच्या माध्यमातून श्रद्धांजली वाहत शोक व्यक्त केला आहे.