Shocking : भयंकर! ४ तरुणांनी रस्त्यात गाठलं, ११ वर्षाच्या मुलीवर बलात्कार करून दगडाने ठेचलं, नंतर पोत्यात कोंबलं अन्...

कोलकात्यातून धक्कादायक घटना समोर आली आहे. बारुईपूर परिसरात ११ वर्षीय मुलीला एका पोत्यात कोंबून जिवंतपणे तलावात फेकण्यात आले. यामध्ये पीडित मुलीचा मृत्यू झाला आहे. मुलीच्या मृतदेहाचा शवविच्छेदन अहवाल समोर आला असून त्यामध्ये धक्कादायक बाब उघडकीस आली आहे. मुलीवर लैंगिक अत्याचार करून तिला बेदम मारहाण केल्याचं पोलिसांनी म्हटलं आहे. याप्रकरणी आता आरोपीला शिक्षा कधी होणार हे पाहणं महत्त्वाचं ठरेल.

मिळालेल्या माहितीनुसार, पीडित मुलगी शनिवारी घरातून बाहेर पडली होती. ती आपल्या मैत्रिणीसाठी वाढदिवसाचं गिफ्ट खरेदी करण्यासाठी गेली होती. मात्र बराच वेळ होऊनही ती घरी परतली नाही. त्यामुळे कुटुंबीयांनी पोलिसांत हरवल्याची तक्रार दाखल केली. शोधमोहीम सुरू असतानाच रविवारी तिचा मृतदेह तलावात एका पोत्यात आढळून आला.

शवविच्छेदनाच्या प्राथमिक अहवालानुसार, मुलीच्या गुप्तांगांवर जखमांच्या खुणा आढळल्या आहेत. याशिवाय शरीराच्या विविध भागांवर ओरखडे आणि चावल्याच्या खुणाही दिसून आल्या. तसेच तिच्या डोक्यावर जड वस्तूने वार करण्यात आला आहे. तपासादरम्यान फुफ्फुस आणि पोटात पाणी आढळल्याने मुलगी तलावात फेकली गेली तेव्हा ती जिवंत असल्याचे पोलिसांनी म्हटले.

दरम्यान, मुलीचा मृतदेह सापडल्यानंतर परिसरात संतापाची लाट उसळली. या गुन्ह्यात सहभागी असल्याच्या संशयावरून संतप्त जमावाने एका व्यक्तीला मारहाण करून ठार केल्याची घटना घडली. त्यामुळे परिसरात तणावपूर्ण वातावरण निर्माण झाले होते. या प्रकरणात पोलिसांनी सोमवारी मुख्य आरोपीला अटक केली. यासह आतापर्यंत तीन जणांना ताब्यात घेण्यात आले आहे. पोलिसांनी परिसरातील सीसीटीव्ही फुटेजची तपासणी केली असता, मुलीसोबत चार जण जात असल्याचे दिसून आले आहे. दरम्यान या प्रकरणी आरोपींना लवकरात लवकर शिक्षा करण्याची मागणी जोर धरू लागली आहे.