Crime : सैराटची पुनरावृत्ती! प्रेमविवाह केल्याचा राग, बापाकडून गर्भवती मुलीची हत्या; नवरा अन् सासू-सासऱ्यांनाही सोडलं नाही

कर्नाटकातून धक्कादायक घटना घडली आहे. निर्दयी बापाने आपल्या गर्भवती मुलीची तिच्याच सासरी जाऊन हत्या केली असल्याचा संतापजनक प्रकार उघडकीस आला आहे. घरच्यांच्या विरोधात जाऊन प्रेमविवाह केल्यामुळे हा प्रकार घडला. या दुर्घटनेत तरुणीचा मृत्यू झाला आहे. धक्कादायक म्हणजे मृत मुलीच्या वडिलांनी तिच्या सासरच्या मंडळींवर तलवारीने वार केला आहे. याप्रकरणी मृत मुलीच्या वडिलांना अटक केली असून पोलीस पुढील तपास करत आहेत.

मिळालेल्या माहितीनुसार, सदर घटना हुबळी तालुक्यातील इनापूर गावात घडली आहे. सात महिन्यांपूर्वी मान्या पाटील आणि विवेकानंद दोड्डामणी यांचा प्रेमविवाह झाला होता. विवेकानंद दोड्डामणी हे दलित समाजाचे होते, त्यामुळे मान्या पाटील यांच्या कुटुंबाने या लग्नाला तीव्र विरोध केला. पोलिसांनी दोन्ही कुटुंबांमध्ये तडजोडही केली. नोंदणीकृत लग्नानंतर मान्या आणि विवेकानंद हावेरी जिल्ह्यात राहत होते, त्यांना घरी परत येण्याची भीती वाटत होती.

तरीही मान्या आणि विवेकानंद ८ डिसेंबर रोजी गावी परतले. लग्नानंतर मान्या सहा महिन्यांची गर्भवती होती. मान्या गावात आल्याचे कळताच, पाटील कुटुंबाने तिची हत्या करण्याचा कट रचला. रविवारी संध्याकाळी त्यांनी विवेकानंदांचे वडील सुभाष दोड्डामणी यांना ट्रॅक्टरने मारून मारण्याचा प्रयत्न केला. त्यानंतर त्यांनी विवेकानंदांना सांगितले की त्यांच्या वडिलांचा अपघात झाला आहे. हे ऐकून विवेकानंद घरातून निघून गेले. मान्या तिच्या सासू रेणवासोबत घरी होती.

घरात दोघे एकटे असताना पाटील कुटुंबाने त्यांच्यावर प्राणघातक शस्त्रांनी हल्ला केला. जास्त रक्तस्त्राव झाल्याने मान्याचा मृत्यू झाला आणि तिच्या सासूला गंभीर दुखापत झाली. सात महिन्यांनंतर, मान्याचे वडील प्रकाश गौडा पाटील, नातेवाईक वीरंगौडा पाटील आणि भाऊ अरुण गौडा, यांनी तलवारीने त्यांच्यावर हल्ला केला. हल्ल्यात जखमी झालेल्यांना रुग्णालयात दाखल करण्यात आले आहे आणि त्यांची प्रकृती धोक्याबाहेर आहे. या घटनेमुळे गावात तणावाचे वातावरण निर्माण झाले आहे. पोलिसांनी मान्याचे वडील प्रकाशगौडा पाटील यांना ताब्यात घेतले आहे. उर्वरित आरोपी फरार असून त्यांचा शोध सुरू आहे.