Crime News : धक्कादायक! IPS अधिकाऱ्याच्या मुलीचा संशयास्पद मृत्यू; विद्यापीठाच्या वसतिगृहात आढळला मृतदेह

प्रमोद जगताप, साम टीव्ही

उत्तर प्रदेशच्या लखनऊ शहरात एक धक्कादायक घटना घडली. राम मनोहर लोहिया नॅशनल लॉ युनिव्हर्सिटीच्या वसतिगृहात एका विद्यार्थिनीचा मृतदेह आढळून आला. अनिका रस्तोगी (वय 19) असं मृत विद्यार्थिनीचे नाव आहे. यामुळे परिसरात एकच खळबळ उडाली आहे. अनिका ही आयपीएस अधिकारी संतोष रस्तोगी यांची मुलगी होती.

तिचा मृत्यू नेमका कशामुळे झाला याचे कारण अद्याप गुलदस्त्यात आहे. याप्रकरणी पोलिसांनी (Police) गुन्हा दाखल केला असून घटनेचा तपास सुरु केला आहे. मिळालेल्या माहितीनुसार, अनिका एलएलबीच्या तिसऱ्या वर्षाची विद्यार्थिनी होती. रविवारी रात्री ती आपल्या वसतिगृहाच्या खोलीत गेली. त्यानंतर तिने दरवाजा उघडला नाही.

मैत्रिणींनी आवाज देऊनही तिने कुठलाही प्रतिसाद दिला नाही. दरम्यान, सेक्युरिटी गार्डने दरवाजा तोडून आतमध्ये प्रवेश केला. तेव्हा अनिका ही बेडवर बेशुद्ध अवस्थेत पडलेली आढळून आली. तिला तातडीने उपचारासाठी रुग्णालयात दाखल करण्यात आले. मात्र डॉक्टरांनी अनिकाला मृत घोषित केले.

अनिकाच्या अचानक मृत्युमुखे संपूर्ण विद्यापीठ प्रशासन हादरवून गेले आहे. तिचा मृत्यू नेमका कशामुळे झाला. याचे कारण अद्याप अस्पष्ट आहे. आशियाना पोलिसांनी तिचा मृतदेह शवविच्छेदनासाठी पाठवला असून, शवविच्छेदन अहवालातच अनिकाच्या मृत्यूचे कारण स्पष्ट होणार आहे.

पोलीस या प्रकरणाचा कसून तपास करत असून अनिकाच्या कुटुंबीयांना या घटनेची माहिती देण्यात आली आहे. अनिकाच्या मृत्यूचे खरे कारण जाणून घेण्यासाठी सर्वजण पोस्टमार्टम रिपोर्टची वाट पाहत आहेत. जे काही सत्य समोर येईल ते पुढे शेअर करून योग्य ती कारवाई केली जाईल, असे पोलीस आणि संबंधित अधिकाऱ्यांनी सांगितलं आहे.