तात्काळ तिकीट ते रेल्वे भाडे वाढ; भारतीय रेल्वेचे तीन मोठे बदल, उद्यापासूनच लागू होणार; वाचा सविस्तर...

नवी दिल्ली : १ जुलै २०२५ पासून भारतीय रेल्वे काही मोठे बदल लागू करणार आहे. ज्याचा थेट परिणाम सामान्य प्रवाशांवर होईल. तात्काळ तिकीट बुकिंग अधिक पारदर्शक आणि सुरक्षित करण्यासाठी भारतीय रेल्वेने आधार पडताळणी आणि ओटीपीची अनिवार्य आवश्यकता लागू केली आहे. भारतीय रेल्वे आता प्रवासाच्या आठ तास आधीच चार्ट तयार करण्यास सुरुवात करणार आहे. जेणेकरून सामान्य प्रवाशांना वेळेवर तिकिटे आणि जागा मिळू शकतील.

जर तुम्ही ट्रेनने प्रवास करत असाल किंवा UPI सारखे डिजिटल पेमेंट वापरत असाल तर हे नवीन नियम जाणून घेणं खूप महत्वाचं आहे. एसी तिकिटांसाठी प्रतीक्षा यादीची मर्यादा एकूण जागांच्या ६०% पर्यंत वाढवण्यात आली आहे. कोणते नवीन बदल होणार आहेत आणि त्यांचा तुमच्यावर कसा परिणाम होईल ते जाणून घेऊया. काही बदल तात्काळ तिकीट बुकिंगशी देखील संबंधित आहेत.

आता तात्काळ तिकीट बुकिंगसाठी आधार आधारित ओटीपी पडताळणी अनिवार्य झाली आहे. १ जुलै २०२५ पासून वापरकर्त्यांना आयआरसीटीसी (IRCTC) वेबसाइट आणि अॅपवर तात्काळ तिकिटे बुक करण्यासाठी त्यांचा आधार क्रमांक लिंक करावा लागेल. याशिवाय, १५ जुलै २०२५ पासून प्रत्येक बुकिंगसाठी अतिरिक्त आधार ओटीपी पडताळणी प्रक्रिया सुरू होईल. तिकिटांचा काळाबाजार आणि बनावट बुकिंग रोखण्यासाठी हे पाऊल उचलण्यात आलं आहे. जर तुम्ही अद्याप आधार लिंक केलं नसेल, तर ३० जूनपर्यंत आयआरसीटीसी वेबसाइटला भेट देऊन ते करा.

प्रतीक्षा यादीतील तिकिटात बदल

एसी कोचसाठी वेटिंग लिस्ट तिकिटांची मर्यादा २५% वरून ६०% पर्यंत वाढवण्यात आली आहे. हा बदल १ जुलै २०२५ पासून लागू होईल, जेणेकरून अधिकाधिक प्रवासी प्रवास करू शकतील, विशेषतः गर्दीच्या हंगामात. पूर्वी २५% मर्यादेमुळे, अनेक जागा रिकाम्या राहिल्या होत्या. परंतु आता ६०% पर्यंत वेटिंग तिकिटे दिली जातील. जर एसी कोचमध्ये ५० जागा असतील तर पूर्वी फक्त १२ वेटिंग तिकिटे उपलब्ध होती, परंतु आता ३० पर्यंत उपलब्ध होऊ शकतात. हा बदल प्रवाशांसाठी दिलासा देणारा आहे. परंतु कन्फर्म सीटची हमी कमी होऊ शकते. प्रवाशांच्या सोयीसाठी आणि गाड्यांचा चांगला वापर करण्यासाठी रेल्वेने हा निर्णय घेतला आहे.

चार्ट ८ तास आधी तयार केला जाईल

आता ट्रेन सुटण्याच्या ८ तास आधी ट्रेन चार्ट तयार केला जाईल. यामुळे प्रतीक्षा यादीतील प्रवाशांना त्यांना जागा मिळाली आहे की नाही याची वेळेवर माहिती मिळेल. पूर्वी हा चार्ट फक्त ४ तास आधी तयार केला जात असे. पहाटे २ वाजण्यापूर्वी सुटणाऱ्या गाड्यांसाठी, चार्ट आदल्या दिवशी रात्री ९ वाजेपर्यंत अंतिम केला जाईल.

१ जुलैपासून रेल्वे भाडे वाढणार

भारतीय रेल्वे १ जुलैपासून प्रवासी भाड्यात किरकोळ वाढ करणार आहे. मेल आणि एक्सप्रेस गाड्यांसाठी, नॉन-एसी गाड्यांचे भाडे प्रति किलोमीटर १ पैशाने वाढेल, तर एसी वर्गातील भाडे प्रति किलोमीटर २ पैशाने वाढेल. ५०० किमी पर्यंतच्या द्वितीय श्रेणीच्या प्रवासासाठी भाड्यात कोणताही बदल होणार नाही. दरम्यान, ५०० किमीपेक्षा जास्त प्रवासासाठी, भाडे प्रति किलोमीटर अर्धा पैसे जास्त वाढू शकते.