Weather Update : पाऊस धुमाकूळ घालणार! २० राज्यांना सतर्कतेचा इशारा; महाराष्ट्रात कसं असेल आज हवामान? वाचा

नैऋत्य मौसमी वाऱ्यांनी देशाकडे पाठ फिरवली असली तरी पावसाला पोषक वातावरण तयार होत आहे. बंगालच्या उपसागरात घोंगावणाऱ्या चक्रीवादळामुळे वातावरणात बदल जाणवत आहे. या चक्रीवादळाचा फटका देशातील राज्यांना बसला आहे. भारतीय हवामान विभागाच्या ताज्या अंदाजानुसार, आज २० राज्यांना मुसळधार पावसाचा अलर्ट देण्यात आला आहे. उत्तर प्रदेश, बिहार, दिल्लीसह देशातील अनेक राज्यांमध्ये पाऊस आणि वादळी वाऱ्यांची शक्यता वर्तवण्यात आली आहे. काही भागांमध्ये ताशी ७५ किलोमीटर वेगाने वारे वाहण्याची शक्यता आहे. त्यामुळे नागरिकांसह शेतकऱ्यांची चिंता वाढू शकते.

हवामानाच्या अंदाजानुसार, उत्तर प्रदेश, दिल्ली, बिहार, उत्तराखंड, राजस्थान, हिमाचल प्रदेश, पंजाब, जम्मू-काश्मीर, पश्चिम बंगाल, झारखंड, ओडिशा, छत्तीसगड, मध्य प्रदेश, केरळ, तामिळनाडू, तेलंगणा, पुद्दुचेरी, आंध्र प्रदेश आणि सिक्कीम या भागांमध्ये पाऊस आणि वादळी वाऱ्यांचा परिणाम जाणवण्याची शक्यता आहे. काही ठिकाणी विजांच्या कडकडाटासह पाऊस पडू शकतो.

अवकाळी पाऊस आणि जोरदार वाऱ्यांचा सर्वाधिक फटका शेतीला बसण्याची शक्यता असते. शेतात उभी असलेली पिकं, काढणीला आलेली पिकं आणि काढणीनंतर शेतात ठेवलेलं धान्य यांचं नुकसान होऊ शकतं. त्यामुळे शेतकऱ्यांनी स्थानिक हवामानाचा अंदाज लक्षात घेऊन योग्य ती खबरदारी घ्यावी.

देशातील २० राज्यांना पावसाचा अलर्ट देण्यात आला असला तरी महाराष्ट्रात मात्र उकाडा कायम असणार आहे. आज कोकणातील पालघर, ठाणे, मुंबई आणि रायगड जिल्ह्यांत उष्ण व दमट हवामानाचा अंदाज असल्याने येलो अलर्ट देण्यात आला आहे. तसेच इतर जिल्ह्यांमध्ये ढगाळ हवामानासह उन्हाचा चटका आणि उकाडा कायम राहण्याची शक्यता हवामान विभागाने वर्तवली आहे.