आई अन् मुलानं १३ व्या मजल्यावरून उडी मारली; पती झोपलेला असताना आयुष्य संपवलं, सुसाईड नोटमधून माहिती उघड

ग्रेटर नोएडा वेस्टमधून एक धक्कादायक घटना उघडकीस आली आहे. ऐस सिटी सोसायटीच्या १३ व्या मजल्यावरून उडी मारून एका महिलेनं आत्महत्या केली. शनिवारी सकाळी मुलाला इमारतीवरून धक्का दिल्यानंतर आईनं उडी मारल्याची शक्यता आहे. पोलिसांनी दिलेल्या माहितीनुसार, गेल्या काही दिवसांपासून, एकुलत्या एक मुलाच्या आजारामुळे आई नैराश्यात होती. तिनं नोकरीही सोडली होती. याच नैराश्यातून तिनं आत्महत्या केली असल्याची माहिती आहे.

बिसरख कोतवाली पोलिसांनी दिलेल्या माहितीनुसार, साक्षी चावला असं मृत महिलेचं नाव आहे. तर, दक्ष चावला असं तिच्या मुलाचे नाव आहे. दक्ष चावला हा मानसिक आजाराने त्रस्त होता. सोसायटीतील रहिवाशांनी सांगितले की, साक्षी मुलाची काळजी घेत होती. मुलाची तब्येत ठिक व्हावी म्हणून ते अनेक देवस्थानात गेले.

पण दक्ष लवकर बरा झाला नाही. त्याला शाळेत धाडले नव्हते. त्याच्यावर औषधोपचार सुरू होते. साक्षीने कधीही मुलाला एकटे सोडले नाही. मुलाच्या आजारपणामुळे ती प्रचंड खचली. त्यामुळे तिनं हे मोठं उचलल्याची माहिती आहे.

पोलिसांनी दिलेल्या माहितीनुसार, फ्लॅटच्या बाल्कनीत एक खुर्ची सापडली आहे. महिलेनं तिच्या मुलाला खुर्चीवर उभे करून खाली ढकलल्याचा संशय आहे. त्यानंतर तिनं स्वत: उडी मारली. घटनेचा तपास करण्यासाठी पोलीस सध्या जवळील सीसीटीव्ही फुटेज तपासात आहे.

पोलिसांना महिलेच्या खोलीतून एक सुसाईड नोट सापडली आहे. यामध्ये महिलेनं तिच्या पतीची माफी मागितली आहे. 'माफ करा. आम्ही हे जग सोडून जात आहोत. आम्हाला आता तुम्हाला त्रास द्यायचा नाही आहे. आमच्यामुळे तुमचे आयुष्य खराब करू नका. आमच्या मृत्यूला कुणीही जबाबदार नाही'. घटनेच्या दिवशी साक्षीचे पती दुसऱ्या खोलीत झोपले होते. या प्रकरणी पोलिसांनी तपासाला सुरूवात केली आहे.