Political News: भाजपला मोठा धक्का, माजी केंद्रीय मंत्री स्थापन करणार नवा पक्ष; राजकारणात खळबळ

Summary -

• आर के सिंह यांनी भाजप सोडल्यानंतर नवीन पक्ष स्थापन करण्याची घोषणा केली

• या पक्षाचा फोकस बिहारच्या राजकारणावर असेल

• प्रामाणिक आणि सुशिक्षित नेत्यांना एकत्र आणण्याचा या पक्षाचा उद्देश असेल

• स्पष्टवक्तेपणामुळे पक्षातून निलंबन झाल्याचा दावा त्यांनी केला

देशामध्ये आता आणखी एका नव्या राजकीय पक्षाची स्थापना होणार आहे. माजी केंद्रीय मंत्र्याने याबात मोठी घोषणा केली. माजी केंद्रीय मंत्री आर के सिंह आता स्वत:चा राजकीय पक्ष स्थापन करणार आहेत. माजी सनदी अधिकारी ते राजकारणी बनलेले आर के सिंह यांनी भाजपला रामराम ठोकल्यानंतर ५ महिन्यांनंतर नव्या पक्षाची स्थापन करणार असल्याचे जाहीर केले. एका मुलाखतीमध्ये त्यांनी ही माहिती दिली. त्यांनी सांगतिले की, त्यांचा प्रस्तावित पक्ष प्रामाणिक, सुशिक्षित, जातिनिरपेक्ष व्यक्तींना एकत्र आणेल. हा नवा पक्ष बिहारच्या राजकारणावर लक्ष केंद्रित करेल.

आर के सिंह हे १२ वर्षे भाजपमध्ये होते. सेवेतून निवृत्त झाल्यानंतर त्यांनी २०१४ मध्ये भाजपमध्ये प्रवेश केला होता. पण पक्षाकडून निलंबित करण्यात आल्यानंतर त्यांनी नोव्हेंबर २०२५ मध्ये भाजप पक्षाला सोडचिठ्ठी दिली होती. आर के सिंह हे कंद्रीय गृहसचिव देखील होते. मोदी सरकारमध्ये केंद्रीय मंत्री म्हणून देखील त्यांनी काम केले आहे.

आरा येथील माजी लोकसभा खासदाराने सांगितले की, आर के सिंह यांना काही विशिष्ट मुद्द्यांवर स्पष्टपणे बोलण्याची सवयी आहे. याच सवयीमुळे त्यांना पक्षातून निलंबित करण्यात आले होते. त्यानंतर त्यांनी पक्ष सोडण्याचा निर्णय घेतला. आर के सिंह यांनी एका वृत्तवाहिनीला दिलेल्या मुलाखतीत सांगितले की, 'मी स्पष्टपणे बोलतो त्यामुळे मला निलंबित केले. पण मी स्पष्टपणे बोलण्याची ही पहिली वेळ नव्हती. मी खासदार असतानाही स्पष्ट बोलत होतो.'

आर के सिंह यांनी पीएम मोदी यांचे नाव घेत सांगितले की, 'माझी मते स्पष्टवक्ती असूनही पंतप्रधान नरेंद्र मोदी यांनी मला सात वर्षे ऊर्जामंत्री ठेवले. ही एक मोठी गोष्ट होती. माझ्या मंत्रिपदाच्या कार्यकाळात पंतप्रधान कार्यालयाकडून माझ्या मंत्रालयात कोणताही हस्तक्षेप झाला नाही आणि मला पूर्ण स्वातंत्र्य देण्यात आले होते. भाजपकडून माझे निलंबन ही शिक्षा आहे असे मी मानत नाही.'